Shillong, Nailur 03: U Nongialehkai ka Mylliem Alem Khongwir ula ioh khur ia ka Hat-trick ban pynlong syndon ia ka Mylliem ban ioh khur ia ka jingjop kaba nyngkong ha ka Shillong Premier League da kaba pynrem ia ka Malki da 3-0 ha ka jingiakhun kaba la long hynne ka sngi Balang ha SSA Stadium, First Ground, Polo.
Kane ka jingiakhun kala kut ha ka jingbym lah ban thep kol ha ka kylla step ha kaba ki nongialehkai jong kine ki ar tylli ki kynhun kila tur shakhmat ban thaw ia ki lad ban ioh thep kol hynrei kim shym la lah ban thaw pyrthei eiei.
Haba la sdang ka jingiakhun ha ka kylla step, u Alem ula ioh ban thep 3 kol ha ka 55, 64 bad 70 minit kaba la pynthikna syndon ia ka Mylliem ban ioh khur ia ka jingjop. Kane kadei ruh ka sien kaba nyngkong eh ba u nongialehkai un ioh thep ia ka hat-trick ha ka SPL mynta ka samoi.
Kine baroh ar tylli ki kynhun kila kiew dang shen na ka First Division sha ka SPL ha kaba ka Malki kala long ka lahduh katba ka Mylliem kala wan baar.
Ha ka jingiakynduh kaba khatduh ka jongki ha ka samoi ialehkai kaba la dep, ka Malki kala jop da 2-1 ia ka Mylliem hynrei mynta ka kynti ka Mylliem kala ioh ban pynrem kylla ia ka Malki ha ka jingiakhun ha ka SPL.
Kane ka jingjop ka Mylliem kala pynlong ia ka ban don ha ka kyrdan kaba 5 jong ka SPL katba ka Malki kala don ha ka kyrdan kaba lah ban shah pynhiar kyrdan biang ryngkat bad kiwei ki kynhun kiba kynthup ia ka Laitkor bad Sawmer.
Ha ka sngi Palei ka jingiakhun kan long hapdeng ka Rangdajied United pyrshah ia ka Nangkiew Irat ha ka por 4:30 nohphai sngi.
