Shillong Lber 15: Kum shi bynta ban buddien ia ki dienjat kaba la sdang da u Kpa (L) Purno Agitok Sangma, ka National Peoples’ Party hynne ka sngi Thohdieng, kala sdang iaka jingialap elekshon da kaba pynlong ia ka jingialang paidbah ha Adokgre, North Garo Hills.
Ka Adokgre kaba la tip ruh kum ka “Chenanggre” ne ka jaka jong ka jingjop, ka dei ka jaka kaba u Purno Sangma u ju sdang ia ka jingialap elekshon bad ha u snem 2016 haba u Conrad K Sangma ula shimti kum u National President ka NPP ula bteng ia kane bad kane ka jingleh kadei kaba la iaid mynta la 30 snem tam.
Ha kane ka jingialap elekshon la iadonlang u President ka NPP Meghalaya u Bah Prestone Tynsong, u MP ka Rajya Sabha u Dr W.R. Kharlukhi, u Working President ka NPP u Marcuise Marak, ki nongialam kiba hakhmat jong ka NPP bad baroh ar ngut ki kyrtong ka NPP kiban iakhun ia ka elekshon MP Lok Sabha kiba kynthup ia ka Dr. Ampareen Lyngdoh na ka Shillong Parliamentary Constituency bad ka Agatha K. Sangma na Tura Parliamentary Constituency.
U National President ka NPP bad u Myntri Rangbah ka jylla u Conrad K. Sangma ula ong, “La kadei ka MP, MLA ne MDC elekshon, u Kpa jong ngi u P.A Sangma u ju sdang beit ia ka jingialap elekshon na Adokgre namar u ngeit skhem ha ka jingjop bad kumta ia ka kyrteng Chenanggre. Ka ju sdang tang na ka madan kaba rit hynrei mynta, haba ngi ieng hakhmat jong phi na ka Stadium kaba pynurlong ia ka jingangnud jong u nongialam jong ngi”.
Ula ong ba ka Meghalaya bad khamtam ka rilum Garo kala sakhi ia ka jingkylla kaba khraw ha kine ki 6 snem kiba la dep.
“Mynshwa, haba ki surok ki bha, ka don ka jingngeit ba ka jaka kadei ka jong ka Assam hynrei haba sniew ki surok ka kdew ia ka rilum Garo, mynta kam long shuh kumne” ula ong.
Haba pan ia ka jingkyrshan na ka bynta ka Agatha, u nongialam ka NPP ula ong “Mynta ka sngi ka Khun jongu P.A Sangma ka ieng hakhmat jong phi ban pan ia ka jingkyrshan. Ngim lah ban klet ia u (L) P.A Sangma.”
Ula ong ba kane ka elekshon ka long kaba kongsan bha ia ka NPP bad ula pynpaw ia ka jingkyrmen ba ka jingjop mynta ka kynti kan long da palat da 1.90 Lak kaba ula ioh ha ka por ba u iakhun ia ka elekshon shiteng samoi hadien ka jingkhlad noh jong u PA Sangma ha u snem 2016.
“Nga don ka jingngeit kaba skhem ba ngin jop da kaba tam kput ia ka Vote ha kane ka elekshon ia kaba kan ym duna ia ka 2.50 lak ne 3 lak” kam u Conrad Sangma.
