Shillong, Iaiong 15: Da ka jingwan poi ka aiom lyiur bad ka jngkiew jong ka jingwan ki nong jngohkai pyrthei sha Sohra (Cherrapunjee), ka Office u Sub-Divisional Officer (Civil), Sohra Civil Sub-Division, u la pynmih ia ki jingbthah ban pyntikna ba baroh ki nongwankai kin don hapdeng ka jingshngain bad kin wan bad leitphai da ka jingkmen.
Ka Sohra kaba pawnam na ka jingdon ia ki kshaid kiba itynnad, ki lum kiba jyrngam bad ki kliar lum kiba itynnad, ka Sohra ka khring da shisha ia ki hajar ngut ki nong jngohkai pyrthei man la u snem. Hynrei ka jaka bad ki jinglong ka mariang ha Sohra ki lah ban kylla long kiba ma, khamtam ha ka por slap, kaba la pynlong ïa ki bor sorkar ban kyntu ïa ki nongwan jngohkai ban long kiba husiar.
Ha ka jingpynbna paidbah lane ka jingbthah ban long kiba husiar khnang ban shngain ki nongleit nongwan kila kyntu ba kin long kiba husiar bha haba ki leit sha ki jaka um, ki kliar lum, ki khlaw bad kiwei kiwei ki jaka kiba don jingma.
Shuh shuh ka ophis u SDO kala maham ba kin da husiar bha ban leit sha ki jaka ba don ki wah bad ki kshaid kiba lah ban buh jingma ia ka jngim bad khamtam eh ha ki jaka kiba shngain ban jngi bad namar ka jingdon ki maw ha ki jaka ba jylliew bad ka um kaba khlain ka lah ban wanrah jingma.
La kyntu ia ki nongwan jngohkai ba kin kiar ban leit sha ki jaka ba long riat bad ruh ban kiar ban leit sha ki jaka ba long sharing ban da peit bha haba iuh ia ki maw.
Shuh shuh la kyntu ia ki nongwan jngohkai ba kidei ban bud ryntih ia ki jaka ba la buh dak bad ban kiar ban sdien ha ki jaka riat ne ki jaka ba btuit namar ka jingbeh jong ka lyer kaba jur ka lah ban wanrah ia ki jingjia ba sngewsih. La bthah ruh ba kidei ban phong da ki juti kibym btuit khnang ban lait ka jingsyntuid.
Ka ophis u SDO kala bthah ruh ïa ki paidbah ba kim dei ban ktah klumar ïa ki jingthung ia kiba ym tip tikna namar ba ki don kiba long bih bad kiba don shiah.
Ban pynthikna ia ka jingshngain ki bor pyniaid ka ophis u SDO kila ai jingmut ba kin ialam lang ia u nonglam lynti ne guide na ka thain kiba la dep shah hikai pyntbit ban iaid ha ki jaka bapher bapher jong ka thain. La pynkynmaw ruh ia ki nongwan jngohkai pyrthei ba kin bud ryntih ia baroh ki dak jingmaham na ka bynta ban iada ia ki.
Shuh shuh ban shngain, ki bor pyniaid ka ophis u SDO kala buh ryntih ia ki kyndon bad baroh ki nongwan jngohkai pyrthei kidei ban bud ryntih haba ki leit sha ki jaka jngohkai.
Haba don kano kano ka jingjia ba kyrkieh, ia ki nongwan jngohkai la pynbiang ia ki number phone kiba donkam bad ki lah ban phone ha Sohra Police Station ha une u number +91 76389 00103 lane ha Sohra Community Health Centre ha une u number +91 88373 60612.
