Shillong, Naitung 21 : U Myntri ka Tnad Community & Rural Development Abu Taher Mondal, ula bthah ia ka Tnad ban pynshi sha la ki C&RD Block ka Jylla kila pyntreikam ne em ia ka minimum wage.
Kane ka jingbthah kala mih hadien ba ka Sorkar kala hap ban pynsangeh ia ka jingplie paidbah ia ka Ophis ka Mawpat C&RD Block namar ka jingpyrshah jong ka Dorbar Shnong.
Ia kane ka jingpyrshah la pynlong namar ka jingkynnoh ba ka Sorkar kam shym la bat ia ka jingkular bala iasoi ha ka por ba aiti ia ka jaka ban shna ia ka Ophis ka Block.
Haba kren sha ki nongthoh khubor ha ka sngi Nyngkong, u Mondal ula ong “Ngi la dep ban pynlong ia ka audit. Hynne, ngi la bthah ia ka Tnad ba kan peit biang sa shisien la kum kine ki kam ki dang don ne em kiba sah ha kiwei ki Block haba iadei bad ka minimum wage”.
Kat kum ka jingong jong u, ka jingialang bad kiwei kiwei ki Tnad ruh yn sa khot pynlong ban iakren ia kane ka kam.
U Mondal ula kular ba halor ka mat bala pynsngew da ka Dorbar Shnong ka Mawpat, ka Sorkar kan sa pynurlong ia ka jingiateh kular kumba ka long.
Kat kum ka jingong jong u, san ngut ki trai shnong la dep ban thungkam ha Mawpat Block bad kum kine ki jingthungkam kila jia ruh ha kiwei kiwei ki Block.
U Myntri ula niew ruh ia ka jingdawa ka Dorbar Shnong ia ka minimum wage na ka bynta ki nongtrei casual kum kaba dei hok shisha. Ula khot ia ki ba kin wan iakren ia ki jingsngewkhia ba ki don beit beit bad u,tangba kin hap ban buh ia ka tarik ban iakynduh.
Halor ka jingkylli, u Mondal ula ong ba ia mynta hi kam pat don satia kano kano ka jingtyrwa ban pynkha ia ka Block thymmai hynrei ka Sorkar ka dang iai bteng ban shong bishar ia ka jingdonkam ban pynkha ia ki Block kaba shong kat kum ka jingdon ki nongshongshnonng bad ka jingjngai jong ki jaka.
U pyntip ba ka Sorkar kala pynkha haduh 56 tylli ki Block haduh mynta, ha kaba 9 tylli la pynkha ha ka samoi treikam jong u snem bala leit lem bad ka Mawhati Block, kaba la pynkha bad plie ha kane ka samoi treikam ba mynta da u Myntri Rangbah ka Jylla Conrad K Sangma, myn ha ka 25 tarik Kyllalyngkot, 2025.
U Myntri u khlem kren pynthikna ia ka tarik ban plie pat ia ka Mawpat Block, da kaba ong ba kan sa jia hadien bala dep ban ia pynbeit ia baroh ki kam bad ki jingpynsngew jong ki trai shnong.
Ula iathuh ruh ba katto katne ki kynhun kin sa wan ban iakynduh ia u bad un sa shong bishar ia kaei ka jingthmu ba ki don.
