Shillong, Nailur 19: U Lamphang ka Iingdorbar Thaw Ain Bah Metbah Lyngdoh ula bthah ia ka Sorkar Jylla ban shong bishar biang ia ka rai ban wanrah ia ka Casino hapoh ka Jylla.
Ha ka shithi bala phah dang shen sha u Myntri Rangbah ka Jylla , u Bah Metbah u ba dei ruh u President ka United Democratic Party (UDP), ula ong ba ka don ka jingbym sngewtynnad na ki Nongialam jong ki seng sain pyrthei bapher bapher, ki Nongialam Niam bad ki Sengbhalang jong ka Jylla halor ka rai jong ka Sorkar ban buh ia ki casino ha Jylla.
U Bah Metbah u la suh lang ia ka shithi ba 14 tarik Nailur, bala phah da u Rev Edwin H Kharkongor, Secretary ka Khasi Jaintia Christian Leaders Forum (KJCLF), kaba kren pyrshah ia kane ka jingthmu ka sorkar.
“Nga ruh nga sngew ban pynpaw ba ka jingpynpaw bad jingsngewkhia jong ki Nongialam Niam ha kane ka shithi, ka dei ia kaba hap shim khia da ka Sorkar na ka bynta ka bit ka biang jong ki paidbah ka Jylla” ong u Bah Metbah haba kdew “Halor kine ki jingsngewkhia bad jingpynsngew, ka Sorkar ka dei ban shong bishar biang ia ka rai halor kane ka kam”.
