Bthah u Justice Katakey ban aiti noh ia ka audit dewiong | Ai jingmut ban pan T.400 klur na ki karkhana dewbilat

Shillong, K’lyngkot 28 : Ka Committee u Justice BP Kataker (Retired) ba thung da ka Iingkashari Meghalaya High Court kala bthah ia ka Coal Audit Committee ban aiti noh ia ka kaiphod kaba bniah hapoh ka artaiew haba iadei bad ka thymmei u dewiong ba ioh pyndonkam da ki karkhana.
Haba pynskhem ia ki jingbthah bala leit, u Justice Katakey ula ban jur ia ka jingdonkam ban leh ia ka audit kaba bniah bha halor ka thymmei jong u dewiong ba pyndonkam da ki karkhana coke, ki karkhana sain nar bad ki karkhana dewbilat ban pynmih bording.
Ha ka kaiphod u snem 2020 ba ula aiti sha ka National Green Tribunal (NGT) Committee, la pynpaw ba katto katne ki karkhana dewbilat kila shu thied ia u dewiong beain khlem da iaid kat kum ki kyndon ain.
Ula bthah ba dei ban phah siew ia ka pisa ba kot T.400 klur na kine ki kompani, ka kam kaba dang sahteng ha ka jingbishar ka NGT Committee bad kaba dang iaid mukotduma hapoh ka Iingkashari Supreme Court.
U Justice Katakey ula mynjur ia ka jingiaid ka kam leh audit ia u dewiong, haba buh jingthoh ba katto katne ki karkhana coke kila kubor ba ki thied ia u dewiong na ki lynti ba beain bad mynjur ban siew ia ka GST ba dei ban siew.
Hynrei katto katne ki karkhana dewbilat kila pan por ban aiti ia ki jubab jong ki. Ka Coal Audit Committee kala ai notice ba dawa ban aiti da ki kot ki sal ban pynshisha ia ki jingkam jong ki.