Shillong, Jylliew 13: U Symbud Myntri Rangbah ka Jylla uba khmih ruh ia ka kam pohiing u Bah Prestone Tynsong hynne ka sngi Palei, ula bthah ia u Superintendent of Police ka West Jaintia Hills ban tohkit halor ka jingkynnoh ba kem bad pynshitom beain da kaba pyndait ksew ia uwei u nongshong shnong ka Pyrdiwah, East Khasi Hills ha ki pulit ka Dawki Police Station, West Jaintia Hills.
“U Bah Prestone Tynsong ula bthah ia u Superintendent of Police (SP) tohkit mardor halor katei ka jingjia” la iathuh u President ka National People’s Youth Front (NPYF) u Bah Kitboklang Nongrem hadien ka jingwan iakynduh ia u Symbud Myntri Rangabh ka jylla ban phah tuklar halor ka jingshah pynshitom u riewrangbah ha ki pulit.
Haba iakren bad ki nongthoh khubor, u Bah Nongrem ula pyntip ba ha ka 12 tarik u Jylliew, uwei u nongshong shnong ka Pyrdiwah, East Khasi Hills ula shah kem bad la ialam ia u sha Dawki Police Station bad ki pulit kila kynshu da u ksew ban dait ia une u rangbah ha kaba ula mynsaw ha katei ka jingjia.
Ula ong ba ka jingshah pynshitom utei u rangbah kadei namar ba ki pulit ki suba ki ba u dei na ka ri Bangladesh.
“Ngi sngewthuh ba ki pulit ki lah ban kem iano iano ruh lada ki suba jur ba kila leh ia ka kam be-aiñ hynrei ka long pat kaei kaei ka bym lah ban pdiang ba ki pulit kin pynshitom ia uba ki suba jur bad ban pyndait da u ksew ia utei u riewrangbah hapoh ka Police Station” ong u Bah Kitboklang Nongrem.
Ula ong, ba kum u nongialam ki samla, kila kyntu ia u Symbud Myntri Rangbah ka jylla ban phah thung ia ka kynhun ban tohkit bad shisien ba kila lap ia ka jingshisha, ki pulit kiba donkti ha kaban pynshitom bein ia utei u rangbah kidei ban shah pynshitom katkum ki kyndon aiñ.
“Ngi la pynsngew ruh ha u Symbud Myntri Rangbah ban peit bad tuklar lem halor ka jingpyndik bad jingthombor khah khah ki BSF bad ki pulit ia ki paidbha kiba sah ha khappud bad ula ai ka jingkular ia ngi ba ka sorkar jylla kala iatreilang bad ki BSF bad ki pulit ban pynthikna ba kadei ban don ka jingiadei kaba iajan hapdeng ki nongshong shnong ha ki thaiñ khappud bad ki pulit bad BSF” ula bynrap.
