Shillong, Naitung 02 : U Symbud Myntri Rangbah ka Tnad Transport Bah Sniawbhalang Dhar ula bthah ia ka Tnad ba kan leh eiei da kaba tyngeh ia ki kali ki riew shimet kiba pynkamai.
Kane ka jingbthah kala mih hadien ka jingshah pyniap dang shen u nongwan kai sngewbha na Indore sha Sohra.
“Nga la bthah ia ki Ophisar ka Tnad Transport ba kin leh eiei khamtam hadien ka jingshah pyniap une u nong Indore” ong u Bah Dhar haba iakren bad ki nongthoh khubor ha ka sngi Balang.
Ula ong ba ki kali shimet kim lah ban phah kamai bad ba ka don ka ain kaba khang ia kane.
“Ka Sorkar kala tip ia kane ka kam bad kala pynlong ia ka jingialang ban pynthikna ba ym dei ban pyndonkam ia ki kali shimet ha ka ban phah kamai khlem da ioh ia ki jingbit” ong u Symbud Myntri Rangbah.
U Bah Dhar ula pynpaw ruh ba ka Sorkar kala buh ia ka kunai a kito kiba pynkhein ia kane ka ain, khamtam lada pyndon kam ia ki scooty shimet ban kamai.
Halor ka jingpynieng kali harud surok, u Bah Dhar ula pynsngew ba ka Sorkar dang shen kala wanrah ia ka policy ban pyrrkhing ia kane bad ka jinglong jingman kala kham biang ha kine ki khyndiat bnai bala leit noh.
U Bah Dhar ula kyntu ia ki paidbah ba kin iatreilang bad ka Sorkar ha kaban weng ia ka jingkhapngiah ki surok ha Shillong, haba ban jur ba ka dei ka jingbahkhlieh jong baroh.
