Shillong, Nohprah 16 : U Symbud Myntri Rangbah ki kam Pohiing (Police) Bah Prestone Tynsong ha ka sngi Nyngkong, ula bthah ia ka seng Hindu-Kutumba Surakshya Parishad (KSP) ba kan pule ia ka riti bat khyndew ka Jylla Meghalaya shuwa ban dawa ia ka Sorkar Jylla ba kan plie ia ka Krem Mawjymbuin ban leh niam ki Hindu.
Haba iakren bad ki lad pathai khubor, u Bah Prestone ula ong “To ngin kyrtiang dien sha ka histori jong ka krem Mawjymbuin. Kane ka jaka kam dei jong ka Sorkar Jylla bad ki dei ban sngewthuh ia kawei lada ki dei nabar ka Jylla, ki donkam ban tip bniah ia ka riti bat khyndew ba ngi don hangne ha Jylla Meghalaya”.
“Kito ki briew, ki bym sngewthuh, nga kyntu ia ki ba kin wan bad wad bniah bad phin sa tip kaei ka riti bat khyndew kaba ngi don ba wat ka Sorkar Jylla lad aka kwah ban shimti ia kano kan ka jaka, ngim lah ban shim katba ki trai jaka kim mynjur ne ai, tad hadien ba ka Shnong, ka Raid lane ki Dorbar bad ki Syiem ki mynjur ngin sa lah ban shimti ia ki jaka” ula ong.
“Namar kata, nga kyntu ia kum kine ki seng la ki dei napoh ka Jylla ne shabar ka Jylla, to ngin sngewthuh ia ka jingshisha halor ka riti bat khyndew ba ngi don hangne namar ym don mano mano ruh ba long halor jong ka. Ym don mano mano ruh kiba long halor ka riti tynrai ba ngi don, namar kata nga sngew ba ngi donkam ban sngewthuh ia kata” ula bynrap.
Ka KSP kala aipor 10 sngi ia ka Sorkar Jylla, bad dawa ban plie noh ia ka krem Mawjymbuin ban ioh lehniam ki paid Hindu. Kane ka kynhun kala byrngem ban pakhang ia ki surok ba kongsan sha Meghalaya kynthup ia ka Jorabat marjan ka Guwahati bad ha Paikan, Goalpara lada ym lah ban pynurlong ia ka jingdawa hashuwa ka Khristmas.
Ka kynrum kynram halor ka krem Mawjymbuin ha Mawsynram, kaba jngai kumba 60 km na Shillong, kala iaid mynta la katto katne bnai. Kane ka krem ka don ia u mawshun uba ki Hindu ki ngeit ba u dei u Blei Shiva. Hynrei, naduh ka 6 tarik Nailar 2024, ka Dorbar Shnong ka Mawsynram kala khang ia ka jinglehniam hapoh kane ka krem da kaba kdew ia ki daw bapher bapher.
Kane ka kam kala poi ruh sha ka jingbishar jong ka Iingkashari Meghalaya High Court, kaba la bthah ia ka Sorkar Jylla ba kan iakren bad ki kynhun bapher bapher ha kaban iapynbeit ia ka kam.
Wat hapdeng kane, u President ka KSP Satya Ranjay Borah ula kam ba ka Sorkar kam shym la leh eiei ia kane ka kam.
