Nongpoh, Nohprah 17 : Saw ngut ki rangbah kila iap hashen katba uwei ula mynsaw jur hadien ba ka trok kit dieng ba ki iashong, kala hap shapoh ka riat kaba jrong kumba 200 meter eiei ha Ri-Bhoi District.
Kane ka jingjia kala jia ha ka janmiet sngi Nyngkong-ka 16 tarik Nohprah, ha ka lynti khlaw kaba don hapoh ka shnong Mynnar Jirang, Ri-Bhoi.
Napdeng kine ki briew ba iap, lai ngut ki dei na ka shnong Iewsohksang, Jirang ba kynthup ia u Bah Edward Nongkhlaw, Teilor Nongphlang bad u Francis Warjri. Uwei pat u dei u Bah Bankerlang Khyllait na ka shnong Centre Village, Jirang.
Uwei pat uba mynsaw jur u dei uba la tip kyrteng u Bah Benedic Syiem, uba dang don mynta hapdeng ka jingsumar ha Nongbah Shillong.
Ki Pulit la Patharkhmah Police Station, kila pynkit ia ki metiap sha Nongpoh Civil Hospital ban leh ia ka post mortem bad da ka jingiarap u MLA ka Jirang Bah Sosthenes Sohtun, ia kine ki metiap la pyllait noh na ka jingleh post mortem bad ia ki met la aiti noh sha ki bahaiing hasem ba kin pyndep iaka lehniam lehrukom ba khatduh.
