Pynbna u Chief Engineer ban pynlip bording haduh 4 kynta
Shillong, Jylliew 28: U Symbud Myntri Rangbah ka Jylla ba khmih ia ka Tnad pynmih bording, Bah Prestone Tynsong, hynne ka sngi ba-ar ula pyntip ba ula bthah ia ka Meghalaya Energy Corporation Limited (MeECL) ba kam dei satia ban pynlip bording (load shedding) palat ia ka 2 kynta.
U Symbud Myntri Rangbah ula ong ba ka jingpynlip bording ha Nongbah Shillong bad ki khapsor ka dei namar ka daw ka jingduh ki Unit pynmih bording jong ki katto katne tylli ki power project bad ka jingdon jingthut bad ka NEEPCO kaba lam sha ka jingduna ha ka jingai bording sha ka MeECL.
Ka Meghalaya Power Distribution Corporation Limited (MePDCL) lyngba u Chief Engineer (Distribution) E/Z Bah P Sakhar ula pynmih ia ka jingpynbna hynne ka 28 tarik ba kan don ka jingpynlip bording ba 4 kynta ha ki thain ka Eastern Zone, ka ban treikam naduh ka 29 tarik Jylliew haduh da pynmih da kawei pat ka jingpynbna.
Kat kum kane ka jingpynbna, ka thain Mustem, Khliehriat, Lumshnong, Mawlyndep, IIM bad NEIGRIHMS la phiah ia ka jingpynlip bording ha ki arbynta ba mar 2 kynta kawei ka ban teikam ha ka por mynstep bad janmiet.
Ka thain Mawlai bad ka NEHU, ka jingpynlip bording kan iaid beit haduh 4 kynta shisien iaid bad kane kan treikam naduh ka por 1 baje mynstep haduh 5 baje mynstep.
Ia ka thain Mawphlang, Sohra bad Nongstoin la phiah ha ki lai bynta ha ka jingpynlip bording kaba long mynstep, mynsngi bad da miet.
Ha ka thain EPIP I &II (HT Consumer), EPIP I &II (Public Feeders) ka thain Killing kan treikam hi saw kynta shi sien treikam.
Haba kylli halor ka daw jong ka jingpynlip bording, u Symbud Myntri Rangbah ula ong “Ka dei ka jingjia bym lah leh eiei ba kawei ka Unit jong ka Leshka Power Project kala sniew, kawei ka Unit jong ka Umtrew, kawei ka Unit ka Umtrew Stage I bad Stage II kila sniew”.
“Ngi kyrmen skhem ba hapoh ka shitaiew, ar ne lai tylli ki Unit ngin sa lah ban pyntreikam biang” ula pynpaw haba pyntip ba ka jingduna ha ka jingpynmih bording hapoh ka Jylla ka long kumba 122 Megawatt.
Haba iadei bad ka jingeh bad ka NEEPCO, u Symbud Myntri Rangbah ula iathuh baka Sorkar kala iakren bad ki bor pyniaid jong ka NEEPCO bad hapoh shitaiew ngi khmih lynti ba ngin lah ban iapynbeit noh ia kiei kiei baroh.
U Bah Prestone u ong ba hadien ka jingiapynbeit ia baroh ki jingeh kiba mih na ki project pynmih bording bad kumjuh ruh ka NEEPCO, ka Sorkar Jylla kan sa weng noh ia ka jingpynlip bording hapoh ka Jylla.
