Shillong, K’lyngkot 20 : U Myntri Rangbah ka Jylla Conrad K Sangma, ula bthah ia ki Ophisar ka Tnad ka Koit ka Khiah ba kin pynbeit ia ka jingduna doktor, ka jingbym don doktor specialist, nos bad ki nongtrei ha Baghmara Civil Hospital.
Kane ka jingbthah ala mih ha ka jingialang bad ki bor pyniaid district, ki nongialam shnong bad ki kynhun bapher bapher ha ka jingleit iuhkjat ha Baghmara, kaba la pynlong ha Conference hall jong ka Baghmara Circuit House.
Haba shong bishar iaka jingtreikam ka Baghmara Civil Hospital, la pyntip sha u Myntri Rangbah ba ka tnad kala phah ia ki doktor specialist sha ka hospital hynrei ym shym la don mano mano ruh ban wan trei, kaba lam sha ka jingiai bteng ban nym don doktor specialist ban ai jingshakri.
Ka hospital mynta ka dei kaba pyniaid tang da 11 ngut ki Medical Officer ha ka jaka jong ki 22 ngut ki doktor kynthup ki doktor specialist. La iaren ruh ia ka jingduna ki nos, ki biomedical personnel bad ki support staff.
Ha kajuh ka por, la pynpaw ba ka Civil Hospital ka dang don hapdeng ka jingpynheh haba pyntip ba ka hospital kala don ia ka jaka buh snam kaba la treikam, ka operation theatre kaba la treikam, ka jaka puid nongpang kaba la treikam.
Halor kine, u Myntri Rangbah ula bthah ia ki Ophisar ba kin pynbeit mardor ia ka jingduna ki nongtrei ha kane ka hospital.
Ka jingialang kala iakren ruh halor ki kam ba iadei bad ka jingioh pahuh ka um, ka jingdon ka ambulance, ka jaka sumar ia ki nongpang hadien bala dep puid.
La bthah ia ki Ophisar ba kin pynthikna ia ka jingioh um ka bym don jingthut da kaba pyndonkam ia ki pisa ba ka don bad ban sdang noh mardor ruh ia ki kam maramot kiba donkam ban leh.
Haba iadei bad ka jingsiew bai jaka, u Myntri Rangbah ula kular ba un sa pyntip sha ka Ministry of Home Affairs halor kane ka kam.
Haba iadei bad ka jaka na ka bynta ka Baghmara Stadium, la bthah ia ki Ophisar ba kin pynbeit noh mar mar ia kane ka kam hapoh kane ka taiew.
