Shillong Jymmang 30: Da ka jingwan jong ka aiom lyiur, ki bor pyniaid district jong ka East Khasi Hills kila kyntu ia ki paidbah ba kin long kiba husiar bad ban shim ia ki lad jingiada.
Ka Additional Deputy Commissioner jong ka East Khasi Hills kaba long ruh ka Commissioner & CEO jong ka DDMA kala ong, namar ka jingiai bteng jong ka jingther slap, kumta la bthah jur ia ki paidbah ba kin shim ia ki lad jingiada bad ban husiar ha ki jaka kiba ju don ka jingshlei um bad ka jaka kiba don ia ki lum.
La kyntu ia ki paidbah ba kim dei ban pyrshang ban jam sha shilliang jong ka wah ne ki wahduid khamtam lada ka don ka jingkiew kynsan jong ka um, ha ki jingkieng ne ki jingkieng dieng kiba la synjor ne shna da ki dieng. La kyntu ruh ia ki ba kin khmih ia ki khubor kiba iadei bad ka jinglong jingman jong ka suinbneng bad ki jingmaham ban kiar ban leit sha kino kino ki jaka kiba la shah ktah.
Namar ka jingther u lapbah lapsan kaba lah ban dang iai bteng ha kine ki sngi ban wan, katkum ka khuubor na ka tnad India Meteorological, la pynpaw ba kala don ka jingkiew jong ka um ha kylleng ki wah kiba don hapoh jong ka East Khasi Hills district.
Ki nongshong shnong khamtam eh kito kiba sah harud jong ki wah bad ki jaka kiba long lum, la bthah ba kidei ban mih ban leit sah noh sha ki jaka kiba shngain haduh ba ka jingther slap kan long jai jai noh.
Nalor kane, la bthah ia ki paidbah ba kin long kiba phikir bha ha ka por ba ther u lapbah ba ka lah ban mih kynsan ka jingshlei um ha ki jaka kiba don hajan ki wah bad ki wahduid.
La kyntu ia ki paidbah ba kim dei ban leit shajan jong ki wah ne ban iaid kai ha ki wah hynrei kidei ban kiar ban leit sha ki wahduid, ki nala bad kiwei kiwei.
La kyntu ruh ba ym dei ban niah ia ki kali ha ki jaka kiba shlei um bad dei ban kiar na ki post elektrik ne ki sainar bording ban lait na ka shah lympat ha ka bording elektrik. La bthah ia ki khynnah skul ba kim dei ban jam sha shilliang jong ka wah ne wahduid ha ka por ba jur slap.
La bthah ruh ia ki nongjngohkai kiba leit kai sha ki jaka jngohkai ba kim dei ban leit tur sha ki wahduid, wah ne ki kshaid.
