Shillong, Iaiong 22 : U Symbud Myntri Rangbah ba khmih ia ka PWD (Roads) Bah Prestone Tynsong ha ka sngi Balang, ula bthah ia ka Central Public Works Department (CPWD) bad ki shipai Border Security Force (BSF) ba kin ai No-Objection Certificate (NOC) na ka bynta ban pyntrei iaka surok PMGSY-III ha ki jaka khappud bad ka Bangladesh.
Hadien ba pyniaid ia ka jingialang bad ki BSF lem bad ki Ophisar ka CPWD, u Bah Prestone ula ong ba kawei na ki jaka ha ka thain Ranikor ka dei ka surok kaba hap hapoh ka CPWD bad BSF.
“I aka mang pisa lah dei ban ai ban tei thymmai ia ka surok hynrei ngi donkam ia ka NOC na ka CPWD bad kumjuh ruh ki BSF” ula ong haba iakren bad ki nongthoh khubor.
U Symbud Myntri Rangbah u ong ba kawei pat ka mat bala iakren ha dei ha ri-lum Garo ha kaba ki don katto katne ki bynta jong ki surok ki hap shabar jong ka jingker sainar khappud.
“Ki don ki bynta kiba iaid shabar ka jingker sainar, ym shapoh ka jingker sainar. Kumjuh kine ki bynta kiba don shabar ka jingker sainar, ki BSF ki sngew ba ngi donkam ban hap ruid lynti da kawei na ka bynta ka surok bad ban wanrah noh shapoh ka jingker sainar namar lada ngi iaid shabar, ka Bangladesh ka pyrshah bad kim shah ia ngi ban shna ia ka surok lane kino kino ki jingtei”.
U Bah Prestone ula ong ba ia kane ka kam la iakren hynne ka sngi bad la bthah ia ka CPWD bad ki BSF ba kin ai ia ki NOC ba donkam, khnang ba yn lah ban sdang noh mar mar ia ka kam.
“Nga la bthah ia ki ba kin sngewbha ban ai ia ka NOC khnang ba ngin lah ban sdang noh ia ka kam naba ki surok ki dei kiba lapynrung ha ka PMGSY-III. Ngi la shim ia ka rai bad ki (CPWD bad BSF) kin sa iakren bad ki bor ba halor bad kin sa ai ia ka NOC sha ngi ban shna ia ki surok” ula bynrap.
 Bah Prestone Tynsong ha ka sngi Balang, ula bthah ia ka Central Public Works Department (CPWD) bad ki shipai Border Security Force (BSF) ba kin ai No-Objection Certificate (NOC) na ka bynta ban pyntrei iaka surok PMGSY-III ha ki jaka khappud bad ka Bangladesh.){kind=link}