Shillong, Naiwieng 19 : Ka Sorkar Pdeng kala bthah ia ka Sorkar Assam bad Meghalaya ba kin pyndep noh ia ki kam baroh ban phiah noh ia u pud u sam ha ki 6 tylli ki jaka bala dep iapynbeit ia ka jingiakajia pud hapoh ka 19 tarik Iaiong, 2025.
Ia kane la pyntip da u President ka Hynniewtrep Achik National Movement (HANM) Lamphrang Kharbani ha ka sngi Nyngkong.
Ka jingdawa ban pynbeit noh ia ka jingiakajia pud hapdeng ka Assam bad Meghalaya ka dei kawei na ki mat jingdawa jong ka HANM ha ka jingleit iakhih sha Delhi myn ha ka 3 tarik Jylliew 2023.
Haba iakren bad ki nongthoh khubor, u Bah Lamphang ula ong “Ngi kmen shisha ba ka Sorkar Pdeng kala shim ia ki sien jam ba donkam ban leh eiei halor kawei na ki mat jingdawa jong ngi. Lyngba u Home Secretary Govind Mohan, ka Sorkar Pdeng kala bthah ia ki ar Jylla Meghalaya-Assam ba kin pyndep noh ia ki kam ban phiah ia u pud u sam hapoh ka 19 tarik Iaiong 2025.
U pyntip ba ka Sorkar Pdeng kala khot ia ka jingialang jong ki artylli ki Jylla ha ka 5 tarik Naiwieng ha Guwahati.
“Ha kane ka jingialang, ka Sorkar Pdeng lyngba u Secretary ka Home Ministry, Govind Mohan, kala bthah ia ki arjylla ba kin pynlong noh ia ka jingialang ban pynbeit ia kane ka kam hapoh u Iaiong 2025” ula kam.
U Bah Lamphrang ula kyntu ruh ia ka Sorkar Pdeng ba kan pynkloi noh ia ka jingpyntreikam ia ka Inner Line Permit(ILP) bad ka jingpynrung ia ka ktien Khasi bad Garo ha ka khyrnit ba phra jong ka Riti Synshar ka Ri.
