Shillong, Feb 15: Ka tnad pule puthi ka jylla Meghalaya kala kyntu ia ki skul ba kin pynkloi ia ka jingpynrung kyrteng ha ka APAAR (Automated Permanent Academic Account Registry) ID, ka jingithuh lyngba ka kor digital da ka jingthmu ban buh ryntih ia ki rekod bad ban pynjanai ia ka rukom treikam.
Ia kane ka jingbthah la pynmih ha ka jingialang jong ka tnad pule puthi kaba la lum da u Commissioner bad Secretary ka tnad Education u Vijay Mantri ha ka sngi Thohdieng.
U Director ka School Education & Literacy u Swapnil Tembe, ula kubur ia ka jingsuki jong katei ka sienjam da kaba ong, “Ngi dang shi sdang bad ka jingpyntreikam ka jong ka dang long tang 1-2 percent. La bthah ia ki skul ba kin pynkloi noh ia kane ka kam.”
Ka APAAR ID, kadei ka jingithuh lyngba ka kor Digital kaba don 12 tylli ki nombar bad la pynwandur ban pynneh ia ki rekod pule naduh klas A rit haduh klas XII shaneng.
“Baroh ki khynnah pule ha ka ri ki dei ban don ia u APAAR ID, u ban neh beit bad wat haduh ka por ba ki pule ha ki college. Kane ka ID yn sa donkam ha ka por ba kynriah jaka pule na kawei ka jaka pule sha kawei pat bad ki skul ki hap ban shim ia ka jingkitkhlieh ban shimkhia ban phah lyngba ka Unified District Information System for Education Plus (UDISE+),” la batai u Tembe.
Ula banjur ruh ba kane ka rukom treikam kadei kaba la iaid lyngba ki jingkhmih bad ki jingpyrshang ki bapher bapher bad ka long kaba donkam bha ban buh oanki rekod ha kaba iadei bad ka pule puthi ha ki jaka pule.
Ka jingialang kala pynleit jingmut ruh ha kaban shimkhia ia ka jingduna ki nongtrei ha ki skul sorkar bad ki skul SSA.
“ngi dang khmih bniah halor ka jinglait thylli ki kam khamtam eh ha ki skul sorkar. Ia mynta ki don kumba 500 tylli ki kam kiba lait ha ki skul Lower Primary bad Upper Primary” la ong u Tembe.
Nalor kane, ka tnad kala bthah ruh ia ki ophisar ban pynkhlain ia ka jingleit jurip ia ki skul ban kyntiew ia kanrukom treikam bad ba kin don ia ka jingkitkhlieh. La bthah ruh ia ki ophisar ka tnad pule puthi ba kin pynjur ia ka jingleit jurip ban pynthikna ba ki skul kin treikam bha bad ba ki khynnah kin ioh ia ki jingdonkam ki jongki.
“Ka jingsdang ia ka jingpule mynta u snem kala long naduh ka 10 tarik u Rymphang bad ha kane ka sngi kaba nyngkong eh la ai ia ka jingbthah ia ki ophisar ka tnad pule puthi ba kin leit jurip ia ki skul bad ban pynshisha ia ka rukom treikam ka jongki.Ki lah dep ban aiti ia ki kaiphod” la ong u Tembe.
Nalor kane ula pynpaw ruh ba ka jingkeit jurip ia ki skul kan dei kaba long man la ka por, ha kaba ki ophisar kin khmih ia ka jingwan hikai tista jongki nonghikai, ka jingsam ia ki kot ki sla bad ki jainskul bad ki kyndon kiba la bhah lyngba ka midday meal. Ban pynbiang thikna ia ki jingtip kiba shisha halor ka jinglong jingman jong ka skul bad ki jingdon jingem ki jongka bad ka tnad pule puthi kala wanrah ia ka jingpyntreikam ia ka School Monitoring App.
“Ki ophisar kiba pynlong ia ka jingjurip ki lah ban plie ia katei ka App, kaban ailad ia ngi ban buddien ia ka jinglong jingman bad ban pynthikna ba kan don ia ka jingtreikam kaba khuid ba suba” la bynrap u Tembe.
 ID, ka jingithuh lyngba ka kor digital da ka jingthmu ban buh ryntih ia ki rekod bad ban pynjanai ia ka rukom treikam.){kind=link}