Shillong, Risaw 30 : Ka Sorkar Jylla kala bthah ia baroh ki trai iing bad ki Nongshongwai jong ki 7 tylli ki Shnong ka Nongbah Shillong, ba kin pynrung kyrteng noh ialade hapoh ka Meghalaya Residents Safety and Security Act, 2016 (MRSSA).
Kine ki 7 tylli ki shnong ki dei ka Nongrim Hills, Pohkseh, Nongrah, Nongmensong, Lapalang, Riat Laban bad Wahdienglieng.
Kat kum ka kyrwoh bala pyllait da ka Sorkar, la ong ba kine ki Shnong ki dei kiba la jied ha ka kylla ba nyngkong, ha ka jingpyntreikam ia ka MRRSA, 2016 hapoh ka Jylla.
Ka Sorkar Jylla kala wanrah bad pyntreikam ia ka Meghalaya Residents Safety and Security Act, 2016 da ka jingthmu ban pynthikna ha kaban pynkhlain ia ki lad jingiada bad jingshngain jong ki nongshongshnong ka Jylla lyngba ka jing bishar bniah ia ki nongshongwai kiba sah hapoh ka Jylla.
Ka ong ba ka jingpyntreikam ia kane ka Ain kan khanglad ia ki riew runar/bymman ba kin ioh jaka rieh hapoh ka Jylla bad ka ban tehlakam ruh ia ka jingwan rung ki poiwir ne ki mynder ba rung beain, kiba lah ban wan rung bad buhai shnong ha ki shnong bapher bapher.
Ka Sorkar ha ryngkat ka jingiatreilang bad ka NIC, Meghalaya, kala pyllait ia ka online application ha ka 8/09/2022 kaban ailad ia ki nongshongshnong (trai iing/nongshongwai) ba kin pynrung kyrteng ialade ryngkat ki jingpynshisha na ki bor shnong.
La bthah ba ki trai iing/nongshongwai kiba sah ha kine ki 7 tylli ki Shnong kin hap ban pynrung kyrteng ialade ha ka application vide URL https://megrssa.nic.in kaba lah ban ioh na ki PC, Laptop, Tablet bad Smart Phone.
Ki kot ki sla ba donkam bad ki jingtip ba bniah lah ruh ban ioh na ka Ophis ka Deputy Commissioner ka East Khasi Hills Shillong bad ki Rangbah Shnong.
