Shillong, Jymmang 20: Ka sorkar jylla ka la bthah ia baroh ki bor District ba kin khynra bad kem ia ki nong Bangladesh bad ki Ronghigya kiba wan buhai shnong beain ha kane ka jylla.
Kane ka jingbthah ka la wan shisngi hadien ba ka Ministry of Home Affairs (MHA) ka la bthah ïa baroh ki sorkar jylla bad ki union territory ba kin thaw ïa ki Special Task Force (STF) ha man la ki district bad ban pynher krad ïa ki nong Bangladesh bad Rohingya kiba wan buhai shnong beaiñ hapoh 30 sngi ban wan.
Haba kren ha ki nongthoh khubor, u symbud myntri rangbah ba peit ia ka tnad kam poh iing u Bah Prestone Tynsong u la ong, “Hooid, ngi la sdang ia ka kam bad ngi la dep bthah ïa baroh ki Deputy Commissioner ba kin khynra ïa kino kino ki jaka ba ki suba ne ïoh jingtip (shaphang ki briew kiba wan rung be-aiñ), dei ban kem mardor ïa ki.”
U bah Tynsong u la pyntip ba ki District Task Force (DTFs) la bynshet ia ka kam ban peitngor ia ki briew kiba wan sha kane ka jylla bad kiba sah ha ki district bapher bapher, kumba la pruid dak ha ka Meghalaya Residents Safety and Security Act (MRSSA), 2016.
“Ha kaba iadei bad ki bar ri kiba wan beain, ngi la dep ban bthah ia baroh ki Deputy Commissioner ban pynshitom bad buh ïa kane ka kam hakhmat eh. Ngi la pyntreikam pyrrkhinh bha Ïa ka (Foreigners’) Act” u la ong.
