SHILLONG, 12 Risaw: Ka sorkar jylla ka la aibor ha ki Deputy Commissioner (DC) jong man ki district ban khangdam ïa ki kharkhana coke ba be-aiñ hapoh ka jylla baroh kawei.
Ia kane la pyntip da u myntri jong ka tnad khlaw u James P.K Sangma uba la ong ruh ba ka sorkar jylla ka dang ap ïa ka kaiphod halor ka jingpynjakhlia mariang da ki kharkhana coke.
Haba kren sha ki lad pathai khubor u James ula iathuh ba ka sorkar ka la thung da ki kynhun ba tbit ban peit bad ban tohkit halor ka jingpynjakhlia mariang jong ki karkhana coke bad na ka liang ka sorkar haduh mynta ka dang ap ïa ka kaiphod.
“Ka sorkar ka dang ap iaka kaiphod jong ka kynhun tohkit bad dei tad hadien bala ioh iaka kaiphod ka sorkar kan sa shim ki sienjam haba iadei bad kane” la ong u James.
U James ula ong ba kano kano ka jait jingpynjaboh ka dei ban pynshong nongrim katkum ki tiar ka juk stad bad naka liang ki karkhana ruh kidei ban bud ryntih iaki kyndon jong ka Meghalaya State Pollution Control Board (MSPCB) hashuwa ban pyntreikam iaki.
Ula ong ba ka sorkar ka sngewkhia iaka jingud jingnam ki paidbah ka thain Elaka Sutnga halor ka jingjyllei ki kharkhana coke hynrei ka sorkar kan hap ban iaid katkum ki kyndon ain ban bishar iaka jingdon kine ki karkhana ym tang hapoh ka thaiñ Elaka Sutnga hynrei ba baroh kawei ka jylla Meghalaya.
“Ym tang ki paidbah hynrei ka sorkar ruh ka sngewkhia halor ka jingjaboh ka mei mariang namar ki karkhana ym tang ba ki ktah ïa ki briew hynrei wat ïa ka mariang ruh kumjuh bad dei namar kane ka sorkar kan ap iaka kaiphod bad kan shim iaki sienjam katkum ka jingai jingmut ka kaiphod” la ong u James.
