Shillong, Jymmang 06: Ka Sorkar Jylla ka la bthah ia ki Deputy Commissioner (DC) jong ka rilum Khasi bad Jaintia ba kin pynbeit mardor ia ka jingshim jaka na ka bynta ban pyndep ia ka jingker sainar shah haki khappud India-Bangladesh.
Ïa kane ka rai la shim ha ka jingïalang ba la pynïaid da u Symbud Myntri Rangbah ba khmih iaka tnat Home (Police) u Bah Prestone Tynsong ha ka jingïadonlang u Inspector General (IG) BSF Meghalaya lem bad ki ophisar ka NBCC.
Ïa kane ka jingïalang la pynlong naka bynta ban bishar bniah ia ka jinglong jingman jong ki thaiñ khappud.
“Nga la lum ka jingialang ban bishar bniah haka jingdon lang baroh ki District Collector bad nga la bthah ia baroh bad nga thikna ba hapoh khyndiat taiew ngin sa lah ban pynbeit ia ka jingeh ban ioh jaka naka bynta ban ker sainar shah haki thaiñ khappud” la ong u Bah Prestone.
U Bah Prestone u la ong “Ngi la kwah shisha ban pyndep ïa kito ki bynta ha kaba ka jingker sainar kam pat dep bad ban pyndep noh ïa kane ka kam katba dang kloi khnang ba ki bor Sorkar Jylla bad Sorkar Pdeng kynthup ïa ki BSF ki lah ban buddien haba ïadei bad ka jingwan rung tuh ki briew shapoh ka Jylla”.
U la ïathuh ba kumba 33-34 km ha shi lynter ka khappud India- Bangladesh haki thain West Jaiñtia Hills bad 7-8 km hapoh ka thaiñ East Khasi Hills kidei ki jaka bym pat ker sainar shah.
Haba kylli, u Bah Tynsong u la ong “Nga la bthah ia baroh ki deputy commissioner jong ka East Jaintia Hills bad West Jaintia Hills bad kiwei ki district ban bishar biang ia kane ka kam kum ka mat kaba kongsan namar phi tip bha ia ka jinglong jingman ha ka ri baroh kawei bad khamtam eh na ka bynta ki jylla ka thain shatei lammihngi, kaba don ha khappud bad ka Bangladesh kam long kaba biang.”
Haba iadei bad ka jingdawa ki nong shong shnong ban ker sainar shah naduh Zero Line, u symbud Myntri Rangbah u la pyntip ba ka Sorkar Jylla ka la dep ban thoh sha ka tnat Ministry of Home Affairs (MHA) ka Sorkar Pdeng ban bishar halor kane.
“Watla ki don ki kyndon haba iadei bad ka jingker sainar haki thain khappud kan dei na 150 Yard, hynrei, khyndiat ki jaka ha kaba ha kaba kut lada ka jingker ka hap ban iaid katkum kane te katto katne ki shnong kin hap noh shabar u pud u sam ka Jylla. Ha kane ka jinglong jingman kaei kaba ngi la leh ka long, ngi la thoh shithi sha ka MHA ban pyrkhat ia kita ki jaka ba ngi don lane kita ki jaka. Ngi la thoh shithi sha ka MHA bad ka MHA ruh ka la pyrkhat halor kane bad ki jingeh kiba kham bun ki don namar 2-3 tylli ki jaka ruh ki don ha kaba ngi dang ap ïa ka jingmynjur jong ka MHA” u la ong.
Haba pynpaw ba ka jinglong jingman haki thaiñ khappud ka long kaba shong shngain, u Bah Prestone u la ong “Baroh shilynter u pud u sam marjan bad ka ri Bangladesh ka long shngain bad baroh ki tnat bapher bapher ki peitngor iaka jinglong jingman ban pynthikna ba ka nong shong shnong ki ioh ka jingshngain”.
“Ngi la dep bthah ba ym dei ban don ka jingwan rung be-aiñ daki nong Bangladesh sha India tad haduh ba kin da biang lut ïa ki kot ki sla. Kata ka dei ka hukum bad ngi dang ïai bteng ban pynthikna ba kam dei don ka jingwan buhai shnong beain” u la bynrap.
 jong ka rilum Khasi bad Jaintia ba kin pynbeit mardor ia ka jingshim jaka na ka bynta ban pyndep ia ka jingker sainar shah haki khappud India-Bangladesh.){kind=link}