Shillong, Jylliew 20: U Symbud Myntri Rangbah ka jylla u bah Prestone Tynsong u ba khmih ruh iaka tnat PWD (Roads) ula iathuh baka sorkar kala hukum iaka tnat ba kadei ban maramot kloi noh iaki surok kiba shah pynjulor haka bor mariang.
“Nga la bthah iaki ophisar ka tnat kynthup ia u Commissioner & Secretary, u Secretary bad iaki Engineers ba kidei ban long kiba peitngor bad ban trei iala ki kam lada wan kano kano ka jingpynjulor ka mariang, bad ka jingmaramot kadei ban dep kloi noh” la ong u bah Prestone.
Haba iadei bad ka jingtwa khyndew dang shen ha Rngain kaba hap hapoh ka Pynursla civil sub-division, u bah Prestone ula ong “Nga la bthah iaki ophisar ka tnat NHIDCL ban long kiba phikir bad ban pynbiang iaki lad jingiada bad ba kin treikam baroh 24 kynta bad ban maramot hapoh shi kynta lada don kano kano ka jingtwa khyndew”.
U bah Prestone ula iathuh ba ka jingtohkit ba khlad 2 ngut ki rangbah ba twa khyndew ha Rngain ka dang iaid bad naka liang ki Pulit bad u IO shen kin sa phah iaka kaiphod shaka sorkar ban leh iaka ba donkam.
Haba kylli halor ka jingtwa khyndew ha Sonapur Tunnel, u Symbud Myntri Rangbah ka jylla ula iathuh ba ka Tunnel ba don haka surok bah NH-6 kam dei hapoh ka jingpeit jong ka sorkar jylla.
“Ia ka surok Shillong-Dawki la aiti shaka tnat NHIDCL ba kan khmih bad ia ka surok Shillong-Guwahati-Jorabat shaduh Sonapur la peit daka NHAI. Ia kine ki tnat la pyniaid bad ki hap jubab shaka tnat Ministry of Road Transport hynrei naka liang ka sorkar jylla ka iatreilang naka bynta ban pynthikna ba ka iaid ka ieng ki kali ne paidbah kam dei ban shah pynthut. Ka tnat Ministry of Road Transport sorkar pdeng kala phah da ki stad na nongbah Delhi bad na IIT ban wan eksamin iaka Sonapur Tunnel naka bynta ban shim rai kumno ban pynbeit ia kine ki jingshah ktah haka twa khyndew jan man ka por ba ther u lapbah” ula ong.
