Shillong, Jymmang 10 : Ka Sorkar Jylla kala bthah ia ka Tnad Pulit ba kin register case halor ka ejahar kaba la ujor pyrshah ia u Director General of Police (DGP) Dr LR Bishnoi, u ban sa shongthait noh ha ka 19 tarik Jymmang.
Ia kane la iathuh da u Symbud Myntri Rangbah ka Jylla ba khmih ia ka Tnad kam Pohiing (Police) Bah Prestone Tynsong uba la iathuh ba ka jingtohkit halor kane ka ejahar kan sdang shu sdang mynta ka sngi Palei.
Kane ka ejahar pyrshah ia u DGP ka dei kaba la mudui da u Ophisar MPS bad Assistant Inspector General (AIG) barim Bah GK Iangrai halor ka jingkynnoh ba u Bishnoi ula leh ia ka kam bymman bad kam shukor da kaba pyndonkam ia ka kali kaba la pyndait da u nombor thok.
Kat kum ka ejahar la kynnoh ba u DGP ula pyndonkam ia ka kali Kia Carnival Limousine kaba la pyndait tuh ia u nombor ML02-A-0001, uba dei u nombor jong ka kali Verna bala thied da ka Tnad kaba pynieng ha Central Workshop.
Haba kylli, u Bah Prestone ula ong “Ia mynta hi ngam pat lah ban ong kumno kumno ruh…ka jingtohkit ka dang shu sdang mynta ka sngi bad ai ba ka ain kan shim iala ka jong ka lynti”.
“Baroh phi sngewthuh hi ba shisien bala register ia ka case, ka rai kaba khatduh kan shong ha ka Iingkashari. Ai b aka jingtohkit kan iaid shakhmat bad ngin sa aiti ia ki jingshem sha ka Iingkashari ba kan shim rai” ula ong.
 Dr LR Bishnoi, u ban sa shongthait noh ha ka 19 tarik Jymmang.){kind=link}