Tura, Iaiong 17 : Ka bor District ka West garo Hills kala pynmih ia ka jingbthah ha ka 18 tarik Iaiong ban long phikir bha ialade namar ka jingiai bteng ka jingshit kyr-ang ka suin bneng haba phah ia ka shithi sha ki Skul ba kin shim rai dalade ha kaban khang iala ki jong ki skul da kaba peitthuh ia ka jinglong jingman bad ka jinglong ka suinbneng.
U Deputy Commissioner ka West Garo Hills ula ong ba ki bor District kin sa shim ia ka rai halor ka jingkhang khyrdep ia ki skul ha ka step sngi ba-ar hadien ba iakren bad baroh ki kynhun ba don bynta ha kane ka kam.
Ki bor District kila pynmih ruh ia ki kyndon ban leh bad ban nym leh (Do’s & Don’ts) ban iada ia ki jingim na ka stroke kynthup ka heat stroke bad sun stroke namar ka jinglong jingman ha ka thain.
Ka Sor Tura marwei kala mad ia ka jingshit ba kot haduh 37-38 degree ha ka sngi Nyngkong bad ka jingshit ka kham jur ha ki jaka them jong ka Ri-lum Garo.
Ka jingbym wan hap u slap bad ka jingnang stang ki khlaw kala nang ktah jur ia ka jinglong ka suin bneng ha Ri-lum Garo.
Ka Wah Simsang kaba heh bha bad kaba tuid na Williamnagar bad Baghamara shaduh sha Bangladesh kala kylla long kum ka wah duid namar ka jingtyrkhong um.
Ki stad ba wad bniah halor ki khlaw bad ka mei mariang, kila maham ba ka jinglong jingman ka lah ban nang sniew ha ki snem ban dang wan namar ka jingnang iai stang jong ki khlaw ki btap.
Ka jingshlei um ba shyrkhei kaba jia mynshem snem ha jan baroh kawei ka Ri-lum Garo ka dei kaba la jia namar ka jing nang jah ki khlaw bad jingpom ia ki dieng ki siej ban rep kwai da ki nongshongshnong tang ban kamai pisa.
Kane ka jingpom ia ki khlaw ki btap kala wanrah ruh ia ka jingkyrduh umbam umdih hajan baroh ki District Headquarter kynthup ka Tura bad Williamnamar namar kiba bun ki catchment area kila ring tyrkhong lut.
