Shillong, Naiwieng 14: Ka sorkar Jylla kala bthah ia ka tnat Police bad iaki bor district ban leh daka ba tyngeh pyrshah ia briew ba niah khlem akor iaki thuk thuk lane ki arshaka ha baroh kawei ka Jylla.
Kane kala hukum kala mih hadien ba kawei ka longkmie na Mawlai Kynton Massar, kala khlad na ka jingshah tynrah ha ka thuk thuk (Bike) hynnin ka sngi Nyngkong ha Mawlai Mawdatbaki, katba ka dang wan phai nala ka kam ban leit shala Iing.
Haba pynbna ia kane u Symbud Myntri Rangbah ka jylla u Bah Prestone Tynsong u ba khmih ruh iaka tnat kam pohïing (Police) ula ong “Ka long kaei kaei kaba sngewsih. Nga lah iohi ba kum kine ki jingjia aksident kila jia jan man ka sngi. Nga la bthah ia u Director General of Police (DGP) ka Jylla bad naka liang u DGP ruh ula bthah iaki Pulit naduh Superintendent of Police (SP) bad ki Pulit Traffic ba kin leh daka ba tyngeh pyrshah ia kino kino kiba niah kali khlem akor la kadei kiba niah arshaka ne kali”.
U Bah Prestone ula ong baka tnat Pulit kala shim khia ruh ban tehlakam iaka jingpyndait ktang sawa beain (Silencer) haki arshaka namar kine ruh ki long ki jingwit bad kiba lah ruh ban wanrah jingma iaki nongiaid nongieng.
“Ka Sorkar kam lah shah iaka jingniah kali khlem akor bad dei namar kane, la bthah iaka tnat Pulit bad iaki bor district ban pynshitom katkum ki kyndon ain pyrshah ai kino kino kiba niah khlem akor” la ong u bah Prestone.
