Shillong, Nohprah 11: Ka Iingkashari Meghalaya High Court ka la bthah ia ka sorkar jylla bad ia ka Airports Authority of India (AAI) ba kin pynkloi noh ia ki kam ban pynheh ia ka kad liengsuin jong ka Shillong, da kaba pynleit jingmut ha ka pyndep ia ka jingshimti jaka bad ban ioh ia ki jingbit kiba donkam.
Ka Division Bench kaba kynthup ïa u Chief Justice Soumen Sen bad u Justice W. Diengdoh, la pyntip ba ka AAI ka la sdang ïa ka kam ban ïoh ïa ka jingmynjur iaka plan bad design na ka Directorate General of Civil Aviation (DGCA) na ka bynta ban pynheh ïa ka kad liengsuiñ jong ka Shillong.
La bthah ia ka Sorkar Jylla ba kan pyndep ia ka jingthied ia ka jaka ba 11.75 acre jongki riew shimet na ka bynta ban pynjrong ia ka runway hapoh ka 10 tarik Kyllalyngkot 2026 bad ban aiti noh sha ka AAI ha kajuh ka sngi. La khmih lynti ba ka jingshimti ia ka jaka ki shipai ruh kan dep noh hapoh ka saw bnai.
Ka Iingkashari kala bthah ia ka AAI ba kan pynsted ia ka jingkhot tender ha ryngat ka technical evaluation kaba la khmih lynti ban pyndep hapoh ka 31 tarik Nohprah 2025.
Ia ka Public Hearing ban ioh ia ka Environmental Clearance lah dep ban pynlong bad ia ka kaiphod lah phah sha ka State Environment Impact Assessment Authority.
“Ngi bthah ia ki bor ba dei khmih ba kin pynsted ia ki kam bad ai ia ka kaiphod haba iadei bad ki sienjam bala shim ban pyndep ia baroh ki jingdonkam bad ki jingbit hashuwa ban lah pyntrei ia ka kam da kiba ioh ia ka tender. Ngi kyrmen ba hapoh ka tarik bala buh ban bishar biang, ka AAI ka dei ban lah ban ithuh ia ki kompani ban pyntrei ia ka project” ong ka Division Bench ha ka hukum ba pynmih ha ka sngi Palei.
Ka Iingkashari kala bthah ruh ia ki bor ba dei khmih ba kin pynbeit noh ia ka kam ba iadei bad ka jingkhein dor ia ki jaka bad ai ia ka kaiphod halor ka jingiaid ka kam haba pyndep ia baroh ki jingdonkam bad jingbit hapoh ka 10 tarik Rymphang, 2026, ka sngi ban shong bishar biang.
“Ngi bthah ia u Deputy Commissioner ka Ri-Bhoi, Nongpoh, Joint Secretary ka Tnad Transport bad u Station Commander, Umroi ba kin iashong jingialang na ka bynta ban pynbeit ia ka kam ba iadei bad ka jingkhein dor ia ka jaka katba kiwei ki kam ki dang iaid. Ia ki jingmih na ki jingiakren dei ban wanrah sha ka Iingkashari ha ka sien shong bishar ban wan. Ngi kyrmen ba baroh ki jingiapher jingmut halor kane ka kam dei ban iapynbeit noh ia mynta khnang ba ki jingpyntrei ia ki kam ban pynheh ia ka kad liengsuin kin ioh ban sdang noh khlem ka jingpynslem shuh” ong ka hukum.
 ba kin pynkloi noh ia ki kam ban pynheh ia ka kad liengsuin jong ka Shillong, da kaba pynleit jingmut ha ka pyndep ia ka jingshimti jaka bad ban ioh ia ki jingbit kiba donkam.){kind=link}