Shillong, Nohprah 04 : Ka Justice BP Katakey Committee kala bthah ia u Chief Secretary ka Jylla ba un pynmih ia ka hukum ka ban pynthikna ia ka jingpynsangeh syndon ia ka jingtih dewiong beain ha East Jaintia Hills District.
Nalor kane, ka Committee kala bthah ruh ia u Deputy Commissioner bad Superintendent of Police ka EJH ba kin ithuh ia ki jaka kiba lah ban don ka jingtih beain bad ban pynkhlain ia ka jingiaid pahara ban pynsaneh ia ka jingtih dewiong beain.
Kane kala mih hadien ka jingujor bala ioh pdiang dang shen na u MLA ka VPP na Mawlai Bah Brightstarwell Marbaniang pyrshah ia ka jingiai bteng ki kam tih dewiong beain ha ka shnong Lumbangla.
Ha ka Interim report ba 34 bala aiti sha ka Iingkashari Meghalaya High Court, ka Justice BP Katakey Committee kala pynrem ia ki bor pyniaid district bad pulit ka EJH namar ka jingbym lah ban tehlakam ia ka jingtih dewiong beain ha ka shnong Lumbangla, wat hapdeng ka jingkhang tih dewiong ka NGT ha u snem 2014 bad ka hukum ka Supreme Court ha u 2019.
Ka Committee kala bthah ia u DC bad SP ka District ba kin pynkhlain ia ka jingiaid pahara bad ban ithuh ia ki jaka ba lah ban don ka jingtih dewong haba bynrap ba ia kine ki kam dei ban khmih hi da u DC bad u SP, ki ba hap ban aiti ia ka kaiphod ba bniah manla u bnai halor ki sienjam ba kila shim ban pynsangeh ia ka jingtih dewiong beain bad ruh ia kiei ki kam ba kila leh kat kum ka ain, haba ki shem ia ki jingtih dewiong beain, sha u Chief Secretary lane u Ophisar ba ula thung, u bym dei ban long hapoh ka kyrdan Additional Chief Secretary.
“U Chief Secretary/Additional Chief Secretary kin hap ban pynmih ia ki jingbthah ba donkam na ka por sha ka por, ban pynthkna ia ka jingpynsangeh ia ka jingtih dewiong beain ha EJH District” bynrap u Katakey.
Ka Katakey Committee kala pynpaw ruh ia ki jingduna ha ka jingregister ia ki ejahar ba iadei bad ka jingtih dewiong beain ha shnong Lumbangla.
Kat kum ka kaiphod ka Committee, ia ka ejahar la ioh pdiang ha ka 28 tarik Nailur 2025 hynrei ia ka case la register ha ka 6 tarik Risaw 2025, kaba pynartatien ia ka jingiaid hok ka rukom phah da u Officer-in-Charge ka Khliehriat Police Station.
Ka kaiphod kala pynpaw ruh ia ka jingioh kurup tang artylli ki jaka thep dewiong wat hapdeng ki sakhi ia ka jingtih dewiong pathar bad ka jingdon ki tiar tih par ha ki par.
Ka Committee kala buh jingkylli ba kumno ki Pulit kim shym la lap ia ki jingtih dewiong beain bad ki kam sei mar.
