Shillong, Nailar 13 : Ka Justice BP Katakey Committee kala ban jur ia ka Sorkar Jylla ban pynmih kyrkieh ia ka plan ba trei kam ha baroh kawei ka Jylla ban pynsangeh ia baroh ki kam tih dewiong beain bad ka jingshalan bad ban wanrah ruh ia ka policy ban khangdam ia ki hajar tylli ki par thliew khnai bala shu ieh.
Ha ka 39th Interim Report bala aiti sha ka Iingkashari Meghalaya High Court, ka Committee kala pynsngew ba ia ki jingbthah barim jong ka committee na ka bynta ka action plan ba bniah, ka dang sah beit kunjuh khlem pat pyntreikam.
Haba pynpaw ia ka jingsngewkhia halor kane ka jingpynslem wat hapdeng a jingbteng ki jingtih dewiong beain, ka Committee ka ong ba ka long kaba donkam bha ban pynmih mardor ia ka jingpynbna ia ka plan ban khanglad, ban bat bad ban pyntreikam ia ki jingbthah.
Kat kum ka kaiphod, u Secretary ka Tnad Mining & Geoplogy ula pyntip ia ka Committee ha ka 29 tarik Jylliew ba ka tnad kala pynkhreh ia ka draft jong ka action plan bad ka dang sah ban ioh ia ka jingmynjur ba khatduh.
“Ia ka action plan kaba bniah bha yn sa pynmih jingpynbna hapoh ka 2 taiew” kular u Secretary.
Ka Committee kala pynsngew ruh ia ki jingma halor ki thliew par ba khlem jingker kiba buh ha ka jingma ia ka jingim ki briew bad ki jingri jingdup.
Watla ka CMPDIL kala aiti ia ka DPR ban pynbha pat ia ki jaka ha ki artylli ki par- Sutnga ha East Jaintia Hills ha ka jinglut ba T.92.78 lak bad ka Arenggtim ha South Garo Hills ha ka jinglut ba T.63 lak-ka report ka pyni ia ka jingbym don ki lad jingshngain ha ki par.
Ka jingtyrwa ka dang ap ia ka jingai jingbit na ka Oversight Committee ka NGT.
Haba pynpaw ia ka jinglong kyrkieh ka kam, ka Committee kala ong ba ka Jylla ka dei ban wanrah ia ka policy ban khang dam bad ker ia ki thliew par khlem ka jingpynslem.
