Shillong, Nailar 13 : Ka Justice BP Katakey Committee kala bthah ia ka Sorkar Jylla ban pyndonkam kloi noh ia ka pisa ba palat T.428 klur bala shu ieh jong ka Environment Fund, thaw ia ka kynhun peitngor ia ki project tih par, pynshisha ia ki karkhana coke bad siew bai lutksan sha ka iing u brew uba iap ha ka par beain.
Ha ka 39th Interin Report bala wanrah hakhmat ka Iingkashari Meghalaya High Court, ka Committee kala pynpaw ba ka “pisa ba dang sah ba T.74,02,05,147 na ka T.100 klur bala thep hapoh ka CPCB bad T.354,52,67,325 bala thep ha ka MEPRF” ki dei ki ban dang pyndonkam ban pynbha pat ia ka mariang bad ki project ba don jingiadei wat hapdeng bun snem bala iaid naduh ba thep ia ki.
Kala ai jingmut ba ka Jylla kan ithuh bad aiti ia ki jingtyrwa kiba iahap…hapoh ka por bala buh” sha ka Oversight Committee bala thung da ka NGT ban pyntreikam bha ia ka pisa na ka bynta ka jingmyntoi ki paidbah ka Jylla Meghalaya.
Ban buddien ia ka jingpyntreikam, ka Committee kala kyrpad ban thaw mardor ia ka High Level Monitoring Committee ka ban peitngor ia ka rukom pyntreikam kaba thikna ia ki project bala ai jingmynjur da ka Oversight Committee bad ka jingpyndonkam ia ka pisa bala mynjur bad pynlait”.
Halor ki karkhana coke, ka Committee ka kyntu ban leh ia ka jingpynshisha kaba kynthup naduh ka jingseng ia ki karkhana coke bala pynshong nongrim na ka CTE bala ai da ka MSPCB, ka jingdon jong kum kineki karkhana coke, ka jingtreikam jong kum kine ki karkhana coke bad ban shong bishar ia ki kot ki sla ban khmih ia ka jingpyntreikam hok ia ka SoP, 2024.
Kala bthah ruh ia ki bor Sorkar ban pynshisha la u dewiong bala kam ba u dei ba wan nabar ka Jylla u dei uba shisha ne em, bad la ka thymmei une u dewiong ka dei kat kum ka lynti ka ain.
Ka Committee kala pan ia ka kaiphod hapoh ka 15 sngi halor kane ka bynta.
