Shillong, Nohprah 05 : Ka Justice BP Katakey Committee kala bthah ia ka Sorkar ba kan pyllait mar mar ia ka pisa sha u Deputy Commissioner ka East Jaintia Hills bad West Khasi Hills na ka bynta ban leit pynpra ia ki 33 tylli ki karkhana coke ki bym shym la iaid kat kum ki kyndon, kat kum ka hukum ka Iingkashari Supreme Court ba 25 tarik Naiwieng, 2024.
Nalor kane, ka Committee kala bthah ruh ia ki bor Sorkar ba kin pynkloi noh ha ka jinglum ia ka pisa ba dang sah sa T.530.59 lak na ki 15 tylli ki karkhana coke bad kiwei kiwei ki karkhana.
“Ka Committee ka ai jingmut ban pyllait noh mardor ia ka pisa ba donkam sha ki bor district ka EJH bad WKH na ka bynta ban leit pynpra ia ki 16 tylli ki karkhana coke ha EJH bad 17 tylli ki karkhana coke ha WKH bad ruh ban pynpra noh mardor ia kine ki 33 tylli ki karkhana coke hadien ba ioh ia ka pisa kat kum ka hukum ba 25/11/2024 bala pynmih ha ka Writ Petition (Civil) No 720/2023 (Druk Fuel Limited -Vs- The State of Meghalaya and Others)” ong ka Committee ha ka interim report ba 34, kaba la aiti sha ka Iingkashari Meghalaya High Court dang shen.
Ka Committee kala ioh ia ka jingtip ba la dep ban ai show cause notice sha ki 16 tylli ki karkhana coke ha EJH hynrei ym pat don ba ai jubab. Ka pisa ba donkam ban leit pynpra yn dang ban ai sha ki bor District.
Ka Committee kala ai jingmut ruh ba ki bor disttict ki dei ban pynthikna ba kine ki karkhana kim dei ban treikam tad haduh ban da pyndep ia ka jingpynpra.
“Tad haduh ban da pynpra, ki Deputy Commissioner bad Superintendent of Police jong kine ki District ki dei ban pynthikba ba kine ki karkhana kim dei ban treikam” kala ong.
Halor ka jingbthah ban lum noh ia ka pisa ba hap siew ki 15 tylli ki karkhana coke, ka kaiphod ka ong ba ki bor Sorkar kila dep ban ai sho cause notice sha ki 20 tylli ki karkhana coke hynrei ym pat don ba siew haduh mynta. La pyntip ia ka Committee ba ia ka pisa ba T.1.31 klur la siew tang da ka M/S Shree Sakambari Ferro Alloy Pvt. Ltd.
Ka Committee kala ai jingmut ban pyndep noh ia ka jinglum ia ka pisa bad ban aiti ia ka kaiphod kaba long ba man hapoh k alai taiew.
“Ngi ai jingmut ban pyndep noh mardor ia ka jinglum ia ka pisa ba T.530.59 lak na ki 15 tylli ki karkhana coke bad T.1,31,37,800 na ka M/S Shree Sakambari Ferro Alloy Pvt. Ltd “ ong ka kaiphod.
Ka Committee kala pan ruh ia ka jingtip halor ka jing register ia ka ejahar bala mudui pyrshah ia ki khyndai ngut ki trai dewiong bad ia ka jingiaid jong ka jingtohkit.
