Bthah ka Katakey Committee ia ka Sorkar ban kurup noh ia u dewiong ba 1.92 lak MT ba tih be-ain

Shillong, Iaiong 30 : Ka Committee u Justice (Retd) BP Katakey kala bthah ia ka Sorkar Jylla ban shim mardor ia ka sienjam ha kaban kurup bad lilam noh ia u dewiong ba 1.92 lak metric ton ba shu tih beain bala shem ha ka jingleh aerial survey.

Kane ka dei kawei na ki jingai jingmut jong ka Committee ha ka 28th Interim report bala aiti sha ka Iingkashari Meghalaya High Court ba kan pynsangeh ia ki jingtih dewiong beain bad pyntreikam ia ki hukum bala pynmih da ki Iingkashari.

Ha ka kaiphod, ka Committee kala ai jingmut ban leh eiei mardor da ki Ophisar bala aibor hapoh ka MMDR Act, 1957 bad ruh ban shim ia ki sienjam kiba dei ha ka ban kurup bad lilam ia u dewiong ba 1,92,840.13 MT ba shu tih beain, ia uba la shem ha ka jingleh aerial survey (survey na suin da ki drone) kat kum ki kyndon jong kane ka Ain.

Ka ong ba dei ban pynkit noh mardor ia u dewiong ba 1.92 MT ba shu tih beain bala lum thup ha kylleng ki jaka, sha ka depot bala ithuh ha man ki District khnang ban khang ia ka jingkhaii beain bad ruh ban pynduna ia ka jingjulor ka mariang.

Ka Katakey Committee kala bthah ruh ia ka MBDA ba kan ai ka jingbatai ia ka AUV survey map ba kala pynkhreh haba iadei bad u dewiong ba lap ha Thateja, Pormawdor, Diengngan, Mawhar, Tinpul bad Rajaju, kiba hap ha South West Khasi Hills bad lada donkam, ban shim ia ka jingiarap jong ka NESAC bad ban aiti ia ka kaiphod hapoh ka 15 sngi.

Kala kyntu ruh ban pyntreikam pyrrkhing bha ia ki jingdonkam baroh bala kdew ha ka Revised Comprehensive Plan, 2022 ha baroh ki liang kynthup ka jingai ia ki MTC kat kum ka clause 10 (c).

Kumjuh ruh, ka Committee kala ai jingmut ban pynlong ia ka survey da ki drone kaba don jingmut bad ba treikam ha baroh ki District ka Jylla Meghalaya na ka bynta ban peit ia ki kam tih dewiong beain, naba ki don ki katto katne ki jaka kiba kam tih dewiong beain ka dang jia, ki dei ki bym lah satia ban poi bad ki donkam ban hap leh da ka survey lyngba ki drone kat kaba lah.

Nalor kane, kala bthah ruh ban buh ia ki nongai jingmut ia ka kynhun bala thaw da ki Superintendent of Police ha ki District bapher bapher ban leh ia ki drone survey bad ka jingiaid pahara ba tista ha abroh ki jaka ba ikop don ka jingtih dewiong beain da ki Pulit, da ki Ophisar kiba bat ia ka kyrdan ym hapoh ia ka Inspector General of Police, khnang ban pyntreikam ia ka jingai jingmut jong ka Committee ha ka para (vi) jong ki jingai jingmut bala kdew ha ka 27th Interim Report ba 07/02/2025;