Bthah ka Katakey Committee ia ka DGP ban thied drone ba kham biang ban syntiat kam tih dewiong beain

Shillong, Jylliew 10 : Ka Justice (Retd) BP Katakey Committee, kala bthah ia ka Director General of Police (DGP) ban shim ia ka rai ha kaban thied ia ki drone kiba kham biang ki rukom treikam, ban ringdur ia ki kam tih dewiong beain bad ban syntiat ha ki jaka tih dewiong ha baroh ki District ka Jylla.

Ha ka interim report ba 30 bala aiti sha ka Meghalaya High Court, u Katakey ula ong ba ka jingsyntiat da ki done ba la don mynta bad ka jingiaid pahara ba man ka por da ki Pulit ka long kaba donkam bha ban pynthikna na ka bynta ban tehlakam ia ka jingtih dewiong beain, kynthup ka jingkhaii, naba ka jingtih dewiong beain ha Jylla ka dang iai bteng kat kum ka jingshem na ka aerial survey bala leh da ka M/S Garuda bad ka MBDA.

“Ka DGP, Meghalaya kan hap ban shim ia ka rai kaba donkam ba iadei bad ka jingthied ia ki drone ba kham biang ki rukom treikam na ka bynta ban syntiat da ki Pulit. Dei ban leh mardor ia kane ka kam” ula ong.

Ka Committee ha ka kaiphod kala ong ba u AIGP (L&O) ka Meghalaya Police, ula ai jingmut ban thied ia ki drone ba kham biang ka rukom treikam na ka bynta ban lap ia ka kam tih dewiong beain bad ruh ban pynlong ia ka jingsyntiat ba man ka por ia ki jaka tih dewiong ha baroh ki District da ki Pulit haba shimkhia kyrpang ia ki jaka bala kdew da ka M/S Garuda bad ka MBDA ha ka kaiphod Aerial Survey.

Ha kajuh ka por, u Under Secretary ka Tnad Mining & Geology, kumba la bthah, ula kyrpad ia ka DGP lyngbaka shithi ba 8/05/2025 ban bthah ia baroh ki Superintendent of Police (SP) ha baroh ki District ba don ki par dewiong ba kin pynjur ia ka jingsyntiat da ki drone namar ki don ki jaka ba jynjar ka leit ka wan bad katto katne ki jaka ba don ki kam tih dewiong beain, ki bym lah satia ban poi, khnang ba yn lah ban tehlakam ia ka jingtih dewiong beain.