Shillong, Rymphang 13: Ka Committee u Justice (Retired) BP Katakey kaba bthah ia ka sorkar jylla ba kan pyrshang tyngeh ha kaba pyntreikam ia ki projek bapher bapher ban ai ka lad kamai jakpoh ia ki paidbah kiba shah ktah na ki kam tih marpoh khyndew ha ka jylla.
Haba aiti ïa ka interim report ba 27 sha ka Iingkashari Meghalaya High Court, u Katakey u la ong, “(Ngi ai jingmut) ïa ka Sorkar Meghalaya ban pyrshang tyngeh ha kaba pyntreikam ïa ki projek bapher bapher ban ai ka lad kamai jakpoh ia ki briew kiba shah ktah ha ki kam tih marpoh khyndew, khnang ban pynkutnoh ia ka ka kam tih par beaiñ ban kamai jakpoh”.
Ka la bthah ruh na ka sorkar jylla ba kan sdang noh mardor ban pyntreikam ia ki projek ba la mynjur da kaba pyrkhat ia ka jingthmu kumba la pynwandur ia ki da ka Oversight Committee.
Ka kaiphod ka la pyntip ba u Secretary ka tnad Mining bad Geology u la pyntip sha ka Komiti ba ka Oversight Committee ka la don ha ka jingïalang kaba hynniew kaba la long ha ka 16 tarik u Lber, 2024 hapoh ka jingïalam jong u Amandeep Garg, IAS, Addl Secretary ka Ministry of Environment, Forest and Climate Change, kala iakren ia kane ka kam kaba ïadei bad ka jingthaw ia ki skhim bad kiwei ki lad kamai jakpoh ia ki briew ba sah ha ki jaka ba ktah ka jingtih par/ki shnong ban ioh iakren bad hadien ka jingiakren kaba sani, la ai jingmut ia ki katto katne ki project ha ryngat ki kyndon.
“Ka tnad pyntreikam ka dei ban bud ryntih ia ki kyndon treikam ba la kdew ha ka DPR. Ka tnad pyntreikam ka dei ban aiti ia ka kaiphod treikam man la ka lai bnai sha ka Technical Committee, ka ban bishar bniah ia ki kaiphod bad ai jingmut sha ka Oversight Committee bad; Ka jingïaid shaphrang jong ka projek kan long hapoh ka jingpeit bniah ba la buh kyrpang da ka State Level Monitoring Committee (SLMC), Directorate of Mineral Resources and State Forest Department.”
La pyntip ruh sha ka Komiti ba kine ki projek harum ki dei kiba la mynjur da ka Oversight Committee ha ka dorbar kaba hynniew jong ka bad kine ki kynthup: “Ka jingiarap ia ki briew ba sah ha ki jaka ba tih dewïong lyngba ki jingthung ia ki jingthung ba iwbih ka ban leh da ka Institute of Natural Resources ha ka dor Rs 20,18,250, ban sumar ia ka Law Adong kaba don marjan ka Kshaid Shadshrieh, Sohra ban kyntiew ia ka Eco-Tourism da ka tnad Forest & Environment ha ka dor T.1,32,50,000, ka jingtyrwa ban shna ia ka Organic Model Firm da ka ophis District Horticulture, Khliehriat ha ka dor T.51,28,532, Ka jingtyrwa ban buh ia ka Barsha Pump Project da ka ophis Divisional Soil & Water Kliehriat ha ka dor ba T.18,50,000 bad ka Jingtyrwa na ka bynta kiwei pat ki lad kamai jakpoh kiba iadei bad ka mariang sha ki briew jong ki jaka ba shah ktah ha ka kam tih par by Directorate of Commerce & Industries haka dor T.22,28,100.”
 BP Katakey kaba bthah ia ka sorkar jylla ba kan pyrshang tyngeh ha kaba pyntreikam ia ki projek bapher bapher ban ai ka lad kamai jakpoh ia ki paidbah kiba shah ktah na ki kam tih marpoh khyndew ha ka jylla.){kind=link}