Shillong, Risaw 25 : Ka Iingkashari Meghalaya High Court ka la bthah ia ki District Magistrate ba kin pynlong jingialang bad ki dkhot jong ka jaidbynriew Khasi, Jaintia bad Hindu bad ban pynkohnguh ia ki ba kin pdiang ia kawei ka Iing thang briew lane kawei ka jaka ban thang ia kiba iap na ka bynta baroh ki jaidbynriew.
Ha ka hukum kaba la pynmih ha ka sngi Thohdieng, ka Iingkashari ka la ong, “Ki District Magistrate lyngba ki nongtrei kiba hapoh jong u, ki dei ban pynlong ïa ki jingïalang bad ki dkhot jong ka jaidbynriew Khasi, Jaiñtia bad Hindu khnang ban pynkohnguh ïa ki ba kin pdiang ïa kawei ka Iing thang briew lane kawei ka jaka ban thang ïa kiba ïap . na ka bynta ki jaitbynriew baroh.”
“Lada donkam, lah ban pynbeit ia ka por ban thang khnang ban buh ia ka por ban thang tang ia ki met iap jong kawei ka jaitbynriew bad ha kiwei pat ki por, yn thang ia kiwei pat ki jaitbynriew. Lane ia ka jaka ban pyndep ia ki jingleh niam lah ban pyniakhlad khnang ba kawei ka jaka kan long kaba la ai sha kawei ka Jaidbynriew bad kiwei pat ki jaka na ka bynta kiwei pat ki Jaidbynriew” kala ong.
“Kane ka jingtip na ki District Magistrate ka dei ban don ïa ki jingtip ba bniah bad ki jingai jingmut kat kum ki block,” ka la ong haba bynrap “Lada don ka jingïapher jingmut hapdeng ki ar tylli ki jaitbynriew ha kaba ïadei bad ka jingïasam lang ïa ka jaka thang ne ka jaka ban thang ne kiwei kiwei, u Amicus Curiae u dei ban leit jngoh dalade ia ka district bad ia kata ka jaka khnang ban pynthikna katba lah ba ki jaitbynriew ba la kdew, kin ia mynjur lang ia katto katne ka rukom treikam kaba iadei lang na ka bynta ban pynkhuid ia ka metiap”.
Ka Ïingkashari ka la bthah ruh ïa u Dr N Mozika, Amicus Curiae ban khot bad pynlong ïa ka jingïalang online bad baroh ki District Magistrate lane ki Deputy Commissioner jong ki khatar tylli ki District ka Jylla, ha kaba nalor kiwei pat yn bthah ïa ki District Magistrate ba kin leh ïa ka kam wad bniah ïa ki jingshisha lyngba ki BDO bad ki nongtrei ba kham hapoh bad ban pyntip sha u Amicus Curiae lada don ki distrik ki bym lah ban ioh ia ka jaka thang briew hapoh 10 kilomitar.
La bthah ia ka Amicus Curiae ban aiti ia ka kaiphod hapoh ka 28 tarik Rymphang 2025.
