Ka Sorkar ka dei ban buh kyndon ia ka jingshim dor rem ki kali kit um
Shillong, Naitung 07 : Ka Iingkashari Meghalaya High Court ha ka sngi Thohdieng, kala bthah ia ka Sorkar Jylla ban wanrah noh ia ki plan ba bun bun snem bad ba shipor ha kaban leh eiei halor ka kam sam umbam umdih ha Nongbah Shillong.
Ha ka hukum, ka Division Bench kala ong “Nalor ka jingeh ba shim dor rem jong ki kali kit um bas am um ha kylleng ki jaka ka Nongbah, kaba ka Sorkar ka dei ban buh kyndon mardor bad ban tuklar, ka dei ban wanrah ruh ia ka plan ba bun bun snem bad ba shipor bad kumno ka Sorkar kan tip haduh katno kan long ka jingdawa ia ka um, shu ong 20 snem hadien”.
Kala ong b aka Sorkar ka dei ruh ban shimkhia bha ha kaban pynkhuid bad pynkhie im pat ia ki wah kiba don ha sawdong ka Nongbah khamtam ki wah bad ki wahduid kiba la shah pynjaboh pura.
Ka District Council ruh ka dei ia kaban shim lang ia ka jingkitkhlieh ban pynthikna ba ki Nongshongshnong kiba sah hajan ki wah kin leh ia kano kano ka kam da ka jingkitkhlieh.
“Ki don ruh ki project ka Sorkar Pdeng kiba don kyrhai ka pisa, khamtam sha ki Jylla ka Thain Shatei Lam Mihngi kiba lah ban ioh” ong ka Iingkashari haba shong bishar ia ka PIL bala mudui da u Working President ka KHNAM Bah Thomas Passah.
Haba bthah ia ka Sorkar Jylla ban ai ia ka affidavit ba batai bniah ia baroh ki mat bala kdew haneng, ka Iingkashari ka ong b aka affidavit ka dei ruh ban kdew kren halor ka Greater Shillong Water Supply Scheme kynthup la ki dang don ne em ki jaka nalor ka Mawphlang, bala tyrwa kum ka jaka ban shna shuh shuh ia ki reservoir.
Pule ruh: Kyrpad ka NEHUSU ia ka Sorkar ban kein shuwa ia ka jingpynlip bording
