Shillong, Nailur 26 : Ka Iingkashari Meghalaya High Court hynne ka sngi Nyngkong, ka la bthah ia ka Sorkar Jylla ban wanrah ia ka plan kaba paka na ka bynta ban shah tih noh ia u dewiong hapoh ka Jylla
“Ka Sorkar Jylla ka lah ban wanrah ia ka plan kaba paka ban shah tih dewiong noh ha Jylla halor ka jingbud ryntih ia ki kyndon jong ka MMDR Act, 1957” ong ka Full Bench bala khlieh da u Chief Justice Sanjib Banerjee ha ka hukum bala pynmih haba shong bishar ia ka PIL.
Ka Iingkashari kala bthah ruh ia ka Sorkar Jylla ban wanrah ia ka plan ba pura ha kaban lilam bad kit noh ia palat 31.26 MT u dewiong bala dep tih bad ba lum thup ha kylleng ki jaka jong ka Jylla.
“Ia kane ka plan ban lilam bad kit ia u dewiong dei ban wanrah ha ka sien shong bishar ia kane ka mukotduma. Ka jingbishar ia kane ka kam kan long biang hadien lai taiew” kala ong.
Ka hukum ka ong ba ha ka sien ba nyngkong, u Justice BP Katakey ula aiti ia ka interim report ba hynriew kaba kdew ba khatduh ka Jylla kala shim ia ki sienjam kiba biang bad ba ihun kaba lah ban long ka jingiarap ban lah die lut ia u dewiong hashuwa ba kut jong u snem 2023.
Ka kaiphod kala ong ruh ba u Secretary ka Tnad Mining & Geology ka Jylla Meghalaya lem bad ki Nongmihkhmat ka Coal India Limited kila aiti ha u Justice Katakey ba ka jingshim rai ba khatduh ia ka plan thymmai ban kit bad lilam ia u dewiong bala dep khein bad pynshisha, yn lah ban pyndep noh hapoh ka shi taiew.
Kane ka kaiphod ka kren ruh halor ka jingpyndep ia ki jingpynshisha bad jingshim jingkhein ia u dewiong ba don ha ki 24 tylli ki jaka bala kdew ha ki interim report ba lai jong ka 23 tarik Jymmang, 2023, laitnoh ki artylli ki jaka ha West Khasi Hills District.
Kane ka kaiphod ba hynriew ka kdew ruh ia u dewiong ba tih beain ba 92,269.43 MT, uba don hapoh ka jingbishar kat kum ka Mines & Minerals (Development and Regulation) Act, 1957.
Ha kajuh ka por ka Iingkashari kala hukum ia ka Sorkar ba kan siew ia ka bainong ba T. 2 lak sha u Justice Katakey.
Ka Iing kashari kala buh ban bishar biang ia kane ka kam ha ka 18 tarik u Risaw.
