Shillong, Iaiong 10 : Ka Iingkashari Meghalaya High Court ha ka sngi Balang, kala bthah ia u Chief Secretary ka Jylla ba un thaw da ka Committee ka ban ai jingmut ia ka Sorkar Jylla halor ki sienjam kiban shim ha kaban khang ia ka jingpom dieng pathar hapoh ka Jylla.
Ka Iingkashari ba kynthup ia u Chief Justice IP Mukerji bad Justice W Diengdoh ha ka hukum ba la pynmih hadien ba bishar ia ka PIL kala ong, “U Chief Secretary ka Jylla un thaw ia ka Committee ki lai ngut ki Ophisar ha kaba u Chief Conservator of Forest un dei uba nyngkong, u stad Botany la u dei uba trei Sorkar ne trei kam shimet un dei uba ar bad u Ophisar ba la rangbah ym hapoh ka kyrdan Secretary un dei uba lai, ki ban :
(a) Ai jingmut ia ka Sorkr halor ki sienjam ba dei ban shim ban khang ia ka jingpom dieng pathar ha baroh kawei ka Jylla. Ka Sorkar ka dei ban leh ia ki kam kat kum ki jingai jingmut.
(b) Ban bishar ia ki kaiphod bala file sha ngi ba kynthup ia ki jingpan jingbit ban pom dieng ha ryngkat bad ka kaiphod jong ki Forest Officer ka thain, ban pynlong ia ka jingtohkit ba laitluid bad ai ia ki jingbthah ba kongsan sha ka Tnad Forest ban pom ia ki dieng lane ban khang lane shim ia kino kino ki sienjam ban iada ia ki”.
Ka Iingkashari kala bthah ruh “Ka Committee kan shim ia ki kam na kawei ka District sha kawei pat bad khmih ia ki aplikeshon ban pom ia ki dieng ha kito ki district kat kum ka ain bad pynmih ia ki jingbthah ki ban long kat kum ki jubab jong ki Forest Officer ki thain”.
Ia kane ka hukum la pynmih hadien ka kaiphod bala aiti sha Iingkashari kaba pynpaw ba ki Ophisar ha ka kyrdan jong ki Range Forest Officer lane Beat Forest Officer ki dei kiba pyniaid ia ki aplikeshon bad kila ailad ban pom dieng pathar halor ka nongrim ba kine ki dieng ki dei kiba don jingma ia ka jingim bad ki nongkynti.
