Shillong Naitung 07: Ka iingkashari Meghalaya High Court kala bthah ia ka sorkar jylla ba kan pynioh ia ka jaka tep ka ban long kyllum ia baroh, da kaba shu thied ne iasoi ia ka soskular.
Kane kala mih kadei hadien ba ka iingkashari kala pyniar ia ka jingtreikam ka Public Interest Litigation (PIL) kaba la pynleit jingmut sha ki jaka thang ia ki briew ba iap na ka jaidbynriew Khasi, Jaintia bad Hindu da kaba kynthup lang ia ka mat ban pyndonkam lang ia ki jaka tep briew hapdeng ki riewngeit Khristan.
Ha ka jingpynmih ia ka hukum hynne ka sngi Nyngkong, ka Division Bench kaba kynthup ia u Chief Justice IP Mukerji bad u Justice W Diengdoh kila bthah ruh ban thaw ia ka Committee ka ban khlieh da u Chief Secretary ban lum ia ki jingialang bad baroh kiba donbynta ha katei ka kam, kynthup ia ki District Council, ki Balang, ki bor sorkar bad ki nongiasaid aiñ jong ka sorkar jylla.
Ka committee kan iatai halor ki jaka kiba long kyllum lang ha kaban tep ia ki briew kiba la iap bad ka jingshim ia ka rai ban pynbeit ia ki jingiaknieh jaka ha kaba iadei bad ka jingsam lang ia ki jaka thang briew.
Ka iingkashari kala shem ruh ba ki don tang khyndiat eh ki jaka tep briew haba ianujor bad jingdon jong ki briew kiba la khlad bad ka jingdawa ia ka jaka na ka bynta ban tep.
“Ki shnong ha nongkyndong ne katto katne eh na ki kila don ia ka jaka jong ka shnong kaba long salonsar. Kum shi bynta jong katei, lah ban ai sngewbha na ka bynta ban ioh tep salonsar ia kiba iap. Hynrei ka long kaba donkam ban ioh bun ki jaka ha kylleng ki district na ka bynta ka jaka tep kaba long salonsar, lada don kano kano kaba hap ban pyniaid shakhmat ban pynbeit ia katei ka jingeh. Ia kitei ki jaka dei ban thied da ka sorkar lyngba ka Land Acquisition ne jingdie shimet ne da kaba iasoi soskular. Ngi bthah ba dei ban shim mardor ia ki sienjam da ka sorkar jylla ban shim ia ki jaka kiba donkam na ka bynta ban tep kyllum lang ne salonsar lyngba ka jingthied jaka ne ka jingiasoi soskular” la ong.
“Ngi bthah ruh ia u ‘Amicus Curiae’ ban iakren bad u Chief Secretary ka Jylla khnang ba yn don ia ka Committee kaban kynthup ia kiba donbynta lang ha katei ka kam, ha kaba u Chief Secretary un long kum u Chairperson bad yn lum ia ki jingialang bad baroh kiba donbynta lang kynthup ia ki nongmihkhmat na ki District Council, nongmihkhmat na ki Balang, nongialam niam, ki bor sorkar, ki nongiasaid ain ka sorkar jylla, ki bor pyniaid shnong bad kiwei kiwei, na ka bynta ban pynioh ia ka jaka ban tep kyllum lang ia kiba la khlad bad ban pyntreikam ia katei ka hukum” la bynrap ka Division Bench.
La pynmih ruh ia ka hukum hadien ba la khmih bniah ia ki jingialang kaba la long hapdeng u Amicus Curiae bad ki bor sorkar.
“Ka jingmih na kitei ki jingialang ka paw ba ki don katto katne ki Balang Khristan lyngba ki iingmane bad kiwei pat ki niam, ki jaka tep shimet. Kine ki Balang kiba don ia la ki jong ki jaka tep kila pyneh ban ai bynta lang ia ki jaka tep ia kiwei pat ki jait Niam. Kim don pat ia kano kano ka jingpyrshah ban ia samlang ia ki jaka tep kiba la thied ne pynioh da ka sorkar jylla ne ki bor sorkar kaban long na ka bynta ban tep ia baroh kiba dei na kiwei pat ki jait niam ne jingngeit” kala ong.
La mudui ia kane ka PIL kadei halor ka jingduna jong ki jaka thang briew bad ka jingpyneh jong ki jaidbynriew Khasi-Jaintia bad Hindu ban ia pyndonkam lang ia ki jaka thang briew.
Hadien ka jingiapynbeit, kine kila poi sha ka jingiasngewthuh jingmut hapdeng ka jongki bad ka iingkashari kala shem ruh ba kum katei ka jingiakajia kala mih hapdeng ki balang Khristan ha kaban iasam ne pyndonkam lang ia ki jaka tep, kaba la pynlong syndon ban pyniar noh ia kane ka PIL.
La bthah ia u Amicus Curiae ban phah ia ka kaiphod kaban kynthup ia ka jingbuh rekod ia ki jingiakren jong ka jingialang hashwa jong ka 30 tarik u Naitung 2025.
Ka sorkar jylla kadei ruh ban siew T.1 lak kum ka jingai jingsiew kaba shipor ia u Amicus Curiae hashwa jong ka tarik ban shong bishar biang ia katei ka kam.
