Ban lah pynbeit noh ia ka kam lum bad theh niut ka sor Jowai
Shillong, Jymmang 22: Ka Iingkashari Meghalaya High Court kala bthah ia ka Sorkar Jylla ba kan lum ia ka jingialang bad ka Jowai Municipal Board (JMB) lem bad ki Rangbah Shnong ki shnong ka sor Jowai khnang ban lah pynbeit noh ia ki kam ba iadei bad ka jinglum bad jingtheh niut kane ka sor.
Kane ka hukum kala mih hadien ka jingfile affidavit da ka Jowai Municipal Board (JMB) bad ka Synjuk ki Waheh Shnong Jowai, kiba la pynpaw ia la ka jong ka jingiohi bad jingshem halor ka kam lum niut hapoh sor Jowai.
“Ka Sorkar ka dei ban lum ia ka jingialang bad ki Nongmihkhmat jong ka JMB bad ki Rangbah Shnong ka Sor Jowai. Ka Sorkar, lyngba ka Ophis u Deputy Commissioner, ka dei ban pynthikna ba ka scheduled bala pynmih da ka JMB ha ka 17 tarik Lber, 2023 ka dei kaba la iabud ryntih” ong ka Division Bench ba kynthup ia u Chief Justice Sanjib Banerjee bad Justice W Diengdoh ha ka hukum bala pynmih hadien ba shong bishar ia ka PIL ka Synjuk.
Kala bthah ruh “Kino kino ki Junior Ophicer jong ka Ophis u Deputy Commissioner ki lah ban leit jurip kynsan bad ai kaiphod sha u Deputy Commissioner, ba u Deputy Commissioner un aiti pat ia ka kaiphod haba kane ka mukotduma kan wan biang sha ka miej shong bishar hadien artaiew”.
“Ia kaba mynta, ka JMB ka dei ban pynpaw ia ka tarik haba kut jong kane ka taiew ba lano ba baroh ki Rangbah Shnong ki dei ban shong jingialang bad ban pyrshang ha kaban iapynbeit noh ia ki jingiapher baroh” ong ka Iingkashari.
Ka IIngkashari kala buh ban shong bishar biang ia kane ka mukotduma ha ka 7 tarik u Jylliew.
