Shillong, Nailar 18 : Ka iingkashari Meghalaya High Court kala bthah ia ka sorkar jylla ba kan thung ia ka Accountability Commission hapoh ka Meghalaya Police Act, 2010 ha ka 4 bnai.
Ka kamram jongka Commission ka long ban tohkit halor ki jingkynnoh jong ka jingleh bakla jong ki pulit bad ban pyn thikna ia ka jingbahkhlieh.
Ia kane ka jingbthah la pynmih hadien ka jingtian bishar ia ka Public Interest Litigation (PIL) kaba la mudui da u Nilberth Ch Marak bad Flaming B Marak, kiba la pynpaw ia ka jingbymlah jong ka sorkar ban thung iaka Accountability Commission watla lah pynlong ain ia ka Meghalaya Police Act, 2010.
“Namar kane, ngi bthah ia ka sorkar jylla ba kan thung ia ka Commission kat kum ki kyndon ka Meghalaya Police Act, 2010 hapoh 4 bnai naduh kane ka sngi ” ong ka division bench kaba kynthup ia u Chief Justice IP Mukerji bad u Justice W Diengdoh ha ka hukum kaba la pynmih hynne ka sngi Nyngkong.
Ka bench ka shem ruh ba ka kamram jongka Accountability Commission ka long kaba iar bad kaba ai ia ki jingbthah, kaba ai ia ka jingbtin lynti bad bthah ia ki kam kiba ka sorkar bad ka tnad pulit kadei ban leh.
Ka Commission ka don ia ka bor ban tohkit ia ki rekod jong ki jingtohjit, ban bthah ban pynkloi ia ki kam tohkit bad ban ai ki jingbthah halor ka rukom shong bishar jong ka tnad.
Ki dkhot jong ka Commission bad ka jingjied ia ki dkhot kadei kaba la kdew ha ka Section 74 jongka Meghalaya Police Act, 2010.
Ka Division Bench kala khmih ruh ia ka jingpynsngew jongu ND Chullai, Additional Advocate General ba ki dang don ruh sa kiwei kiwei ki ain bala treikam kaba aibor ia ka jingtreikam jong ka Commission bad dei na katei ka daw ba ia katei ka ain ym shym la pyntreikam shuh.
“Lada dei kumta, ka sorkar jylla kan long laitluid ban pynkylla ne pynduh ia ka Meghalaya Police Act, 2010. Katba ym pat leh eiei ia kane, ia ki jingbthah ha kane ka hukum jong ngi dei ban pyntreikam beit” kala ong haba pynkut ia kane ka PIL.
