Shillong, Naiwieng 27 : Ka Iingkashari Meghalaya High Court ha ka sngi Balang, kala hukum ia ka Shillong Municipal Board (SMB) ban aiti ia ka kaiphod halor ki sienjam ba kala shim haba iadei bad ki ksew surok bad ban shim ruh ia ka sienjam ha kaban shna ia ki jaka pynsah ia kine ki ksew da ka jingiarap jong ka Sorkar Jylla.
Ha ka hukum bala pynmih hadien ba shong bishar ia ka PIL, ka Iingkashari ba kynthup ia u Chief Justice IP Mukherjee bad Justice W Diengdoh kala ong “Ngi btah ba dei ban shim mardor ia ki sienjam ha kane ka bynta da ka Board da ka jingiarap lang jong ka Sorkar Jylla bad ban pyntip ia kaei ka sienjam bala shim ha ka kaiphod ka ban aiti sha kane ka Iingkashari hapoh ka 5 tarik Rymphang, 2025”.
Ka Iingkashari kaa shim ia ka judicial notice halor ka jingshisha ba ki ksew surok kila nang kharoi bad buh jingma ia ki paidbah. Ka jingbun jong ka jingshah dait kdew bad jingiap namar ka jingpang rabies kala bun.
Ka ong ba u nongiasaid Ain ka Shillong Municipal Board ula pynpaw ba ka Board kala shim ia ka sienjam ban ai injek ia ki ksew na ka bynta katei ka jingpang bad injek ruh ia ki khnang ba kin nym kharoi. Hynrei, haduh mynta kam pat shym la don satia ka jaka ban pynsah ia kine ki ksew.
Ki briew ka Municipal ki kem ia ki ksew na surok, ai injek ia ki bad hadien kila pyllait biang ia ki sha surok.
“Haba ngi iaroh ia ka kam bala leh da ka Municipal Board, ka long pat kaba donkam ia ka Board ban shna ia ka jaka sah khang ban lah buh ia kine ki ksew” ong ka Iingkashari.
Haba iadei bad ka kam ban pynkynriah ia ka Zoo ba mynta na Shillong, ka Iingkashari kala pynpaw ia ka jingsngew hun halor ki sienjam bala shim da ka Sorkar Jylla.
U Nongiasaid Ain ka Jylla ula pyntip hakhmat ka Iingkashari ba ha u bnai Jylliew 2024, ia ka Zoo ha Shillong la pynkynriah noh sha ka jaka kaba jngai kumba 35 Km na Shillong. Ki jingdonkam baroh kila don nalor ka hospital veterinary bala pyniaid da ki doktor kiba tbit.
Jan baroh ki mrad na ka Zoo lait noh ka skei ba dang armet bad ki sim, la dep ban pynkynriah sha kane ka jaka ba thymmai kaba la tip kum ka Meghalaya State Zoo.
Ia ki sim ym pat lah satia ban pynkynriah namar ki dei kiba hap ban set ha ki sem, ka jingtei ka bym pat shym la lah ban pyndep haduh mynta, ong ka hukum.
