Shillong, Nailar 29 : Ka Iingkashari Meghalaya High Court kala bthah ia ka Shillong Municipal Board (SMB) ba kan pynlong ia ka survey kaba bniah bad aiti ia ka jingkhein halor ka jingdon ki nongshong dukan madan ha ka thain Laitumkhrah hapoh ka lai taiew bad pynthikna ruh ba ym dei ban ailad ia ki riew thymmai ba kin buh dukan madan ha ka thain.
Kane ka jingbthah ka Iingkashari kala mih hadien ba ka SMB kala aiti ia ka kaiphod ba pynpaw ia ka jingdon bun ngut ki nongshong dukan madan ha ka thain ki bym pat don ia ki licence shong dukan madan.
Ka kaiphod SMB ka shem ba 122 ngut ki briew ki buh ia ki dukan madan ha ka thain Laitumkhrah khlem ka licence. Na kine, 22 ngut la shem ba ki dei kiba dok hok ban ioh kat kum ki kyndon jong ka skhim.
Ka Board kala shem ruh ba 48 ngut ki nongshong dukan ba dang thymmai kila kam ba ki dei ki nong shongdukan madan.
“Namar kane, donkam shuh shuh ban leh eiei na ka SMB. Ngi bthah kumne harum : Ka Board hapoh ka lai taiew naduh mynta a sngi kan pynlong ia ka survey kaba bniah ha thain Laitumkhrah bad ban lum jingkhein ia ka jingdon ki nongshong dukan madan ba die dukan ha ka thain ryngkat ki jingtip ba bniah haba iadei bad ki kyrteng, ki mar ba ki don bad ki jaka ba ki shong, bad ka por naduh ba ki shong dukan” ong ka Division Bench ba kynthup ia u Chief Justice IP Mukerji bad Justice W Diengdoh ha ka hukum ba pynmih ha ka sngi Thohdieng hadien ba shong bishar ia ka aplikeshon jong ka Seng Samla Laitumkhrah.
“Ka Board da ka jingiarap ki bor district kynthup ki Pulit kin pynthikna ba tad haduh da pynmih da kawei pat ka hukum, ym dei ban ailad ia ki riew thymmai ba kin buh dukan madan ha ka thain. Ban khanglad ia kane, ka jingpeit pyrman ba pyrrkhing bha dei ban leh. Ka Board kan sa shong bishar ia baroh ki aplikeshon ba dang sah hashuwa ba kan ai ia ka certificate of vending/vending licence bad bishar ia kine ki aplikeshon kat kum ka ain hapoh ka phra taiew naduh mynta ka sngi” kala ong.
“Kane kan kynthup ruh ia ki 22 ngut ki nongshong dukan madan ia kiba ka Board ka niew kum kiba don hok ban ioh licence kat kum ka kyndon jong ka skhim” kala ong haba bthah ruh “Ka Board ka lah ban ai ka lad sha kito ki nong shong dukan madan ba dei hok ban ioh licence hynrei ki bym pat buh aplikeshon lane ki bym pat don licence ba kin aplai ia ki bad ban pyniaid ia ki kam kat kum ka ain” kala bynrap.
La bthah ruh ia ka SMB ha ryngkat ki bor district ba kin ithuh ia ki jaka kiba iahap na ka bynta ban pynkynriah noh ia ki nongshong dukan madan ba don licence.
Ka Iingkashari kala bthah ruh ia ka Jylla bad ia ka SMB ba kan ai ia ka kaiphod ba pynkhreh lang lane ba pynkhreh la la ka jong hashuwa ka sngi shong bishar biang ia ka PIL. Ia kane ka PIL la buh ban bishar biang hadien phra taiew.
 ba kan pynlong ia ka survey kaba bniah bad aiti ia ka jingkhein halor ka jingdon ki nongshong dukan madan ha ka thain Laitumkhrah hapoh ka lai taiew bad pynthikna ruh ba ym dei ban ailad ia ki riew thymmai ba kin buh dukan madan ha ka thain.){kind=link}