Shillong, Nailar 09: Ka Iingkashari Meghalaya High Court, ha ka sngi Balei, kala bthah ia ka Dorbar Shnong ka Mawsynram ba kan iapynbeit da ka jingiasngewthuh lang halor ka kam ai NoC ban pynlong ia ka jingiaid pilgrim sha krem Mawjymbuin, kaba don ha Mawsynram, East Khasi Hills District.
Kumta, ka Iingkashari kala bthah ban wanrah biang ia kane ka kam sha ka jingbishar ha ka 14 tarik Nailar, ban ioh pynmih ia ka hukum.
Ki Nongialam Shnong ka Mawsynram, ka Deputy Commissioner bad Superintendent of Police ka East Khasi Hills, kila shah khot ban wan mih hakhmat ka Iingkashari ha ka janmiet sngi palei hadien ka jingbishar ia ka mukotduma bala mudui da ka Yatra, kaba dei ka Society bala register, pyrshah ia ka jingkyntait ai NOC da ki bor ba dei khmih ban pynlong ia ka jingiaid pilgrim sha krem Mawjymbuin, kaba la khein kyntang bha da ki Hindu.
Haba iakren bad ki nongthoh khubor hadien ka jingbishar, u Nongiasaid Ain VGK Kynta ula ong “Ngim lah ban kynthoh eiei ia mynta namar kane ka kam ka dang don ha ka jingbishar hynrei ka Iingkashari kala ailad ia ka Dorbar Shnong ka Mawsynram ban shimrai halor kane ka kam bad ban iapynbeit ruh da ka jingiasngewthuh jingmut lang”.
Haba kylli, u Bah Kynta ula ong “Ka Iingkashari kala bthah ia ka Dorbar Shnong ban shim rai halor kane ka kam haba buh hakhmat ba kane ka jaka ka dei ka jaka jngohkai kaba khring bha. Hynrei ka mat hi ka long ba ngim lah ban kren palat ia kaei kaba la iakren hapoh ka Iingkashari namar ka kam ka dang don hapdeng ka jingbishar hynrei ka Dorbar Shnong kan sa shim rai hadien ka jingiasyllok bad ki kynhun bapher bapher kynthup ka Seng Khasi”.
Une u Nongiasaid Ainu la pyntip ba ka Dorbar Shnong bad kiwei kiwei ki kynhun kim don jingpyrshah satia ia ka jingiaid (yatra) hynrei ki pyrshang tang ban pynlong ia kane ka krem kum ka jaka mane Blei.
Ia kawei pat ka jingkylli, ula ong “Haba don ka jingpynkhein kyndon na ka por sha ka por, ka Dorbar Shnong ka don ia ka hok ban kyntait ai jingbut namar haba ngi buh ia ki kyndon, ki SOP, lada ia kine la pynkhein, kaei kaba ngi hap ban leh, ngi kyntait”.
