Shillong, Rymphang 25 : Ka Iingkashari Meghalaya High Court kala bthah ia ka Sorkar Jylla ba kan tohkit ia ka jingdon jingiadei hapdeng ki nongshalan bad ki nongthied ia ki dewiong beain kum shibynta jong ka kyndon treikam ka Judicial Enquiry Commission.
Kane kala mih kum ka jingbuddien ia ka jingbthei ka par dewiong ha Mynsngat-Thangsko, East Jaintia Hills, kaba la shim jyndat ia ka mynsiem ki 33 ngut ki briew.
Ha ka hukum ba pynmih ha ka sngi Ba-ar, ka Division Bench ba kynthup ia u Justice HS Thangkhiew bad Justice W Diengdoh, kila kdew ba watla ki kyndon treikam jong ka Commission ki paw ba ki don bun bad ba bniah, hynrei kam don satia ka kyndon ban tynrong ia ka jingkitkhlieh ha ki briew kiba donkti lane ki bor ba dei khmih.
“Haba phai sha ka jingthaw ia ka Judicial Enquiry Commission, ki kyndon kiba la buh, watla ki paw ba ki don bun bad bniah, kaba donkam ka long ka jingaiti ia ka kaiphod jingshen ba bniah halor ki kam bad ki jingleh bakla jong ki briew lane ki bor khmih, hynrei, ym shym la kdew satia kano kano ka jingtynrong ia ka jingkitkhlieh ha kine ki briew lane ki bor khmih khnang ban lah ban leh eiei pyrshah ia ki katkum ka lynti ka ain” ong ka Iingkashari.
Ka Iingkashari kala bthah ruh ia ka jingdonkam ban tohkit halor ka jingiadei hapdeng ka jingshalan bad ka jingdawa ia u dewong beain, haba pynpaw ba “kan ym don ka jingtih beain lada ym ai ding da ka jingdawa, kaba pynlong ia kane ka kam kaba ma ba kan iohnong bha”.
“Ngo don ka jingsngew ba ka long kaba donkam ba ka Sorkar Jylla kan kynthup ia kane ka kyndon treikam ha ka jingtohki” bynrap ka Iingkashari.
Haba iadei bad ka Special Investigation Team (SIT) bala thung ban tohkit ia ka jingjia ha par dewiong ha Thangsko, ka Iingkashari kala khmih bniah ia ki kyndon treikam bad pynpaw ia ka jingsngewhun bad ka jingkular bala ai da u Advocate General ba u Heh Ophisar ba kham rangbah duh un khlieh ia ka kynhun.
Ka Iingkashari kala shong bishar ruh ia ka kaiphod halor ki kam bala leh pyrshah ia ka jingtih dewiong beain, khamtam namar ka jingjia ha Thangsko- bad ban jur ia ka jingdonkam ban pynbteng ia ki jingpyrshang ha ban tehlakam ia ka jingtih dewiong beain ha ka Jylla.
Kane ka kaiphod ka pyntip ia ki ejahar bala register, ka jingkem ia ki briew, ka jingkurup ia ki dewiong beain, ki tiar pynbthei bad ki tiar ba pyndonkam ban tih par.
Hynrei, ka Iingkashari ka sngew ba ki dang don shibun kiei kiei kiba hap leh ban pynbeit ia kane ka kam.
U Advocate General ula kular ia ka Iingkashari ba ka Sorkar kan sa nang shim shuh shuh ia ki sienjam halor kane bad ia kane ka kam la buh ban bishar biang bad ban nang pynmih hukum ha ka 5 tarik Lber, 2026.
U Superintendent of Police ka East Jaintia Hills District, Pankaj Rasgania bad Superintendent of Police barim ka East Jaintia Hills Vikash Kumar, la bthah ba ki dei ban don biang ha iingkashari ha ka sien shong bishar ban wan.
