Shillong, Nohprah 19 : Ka Iingkashari Meghalaya High Court ha ka sngi Ba-ar, kala hukum ia ka Sorkar Jylla ba kan pynkynriah kam noh mardor ia u Superintendent of Police (SP) ba mynta ka East Jaintia Hills namar ka jingbym lah ban pynsangeh ia ka jingtih tuh ia u dewiong bad jingshalan hapoh ka District.
“Halor ka jingbym lah jong u SP kumba la paw ha ka 19th Interim report, kumta la hukum ba dei ban pynkynriah kam noh mardor ia u n aka kam ba u bat mynta bad thung mardor da uwei u Ophisar ba lah ban treikam hapoh ka District “ ong ka Iingkashari ba kynthup ia u Chief Justice (Acting) HS Thangkhiew bad Justice W Diengdoh ha ka hukum bala pynmih halor ka PIL bala mudui ia kane ka kam.
Ka hukum ka ong ba u Superintendent of Police kumba la pyntip, ula shah thungkam ha EJH naduh u snem 2021 bad u namar kata, u dei ia kaban tip bha ia kaei kaba jia hapoh ka District.
Ka Interim report ba 19 bala aiti da u Single Member Committee, ka pyni ba u Superintendent of Police lehse um shym la leh eiei ha kaban ratdyngkhong ia ki kam beain.
Ka Iingkashari kala hukum ruh ia ka Tnad kam Pohiing bad ia u Director General of Police ba kin leh eiei mardor halor kane ka hukum.
Ha kajuh ka por, ka Iingkashari kala byrngem ban ai da ka notice contempt pyrshah ia ki bor District halor ka jingkdew jong ka interim report ia ka jinglap biang ia ka jaka pyllang dewiong ba thymmai harud surok National Highway ha Byndihati nalor u dewiong bala pyllang ha lyndet ha Don Bosco College.
Ka Iingkashari ha ka hukum kala ong, haba ailad ia ka Jylla ban jubab ia ka 19th interim report bad ban nym pat pynngat ha ka contempt, u Deputy Commissioner bad u Superintendent of police kiba don ha ka thain, la khmih lynti ba kin pynthikna ba ka ain kan treikam bad ban burom ruh ia ka hukum ka Iingkashari.
Ka Iingkashari kala hukum ruh ban siew ia ka jingsiew ba T. 3 lak sah u Justcie Katakey nalor ki allowance bad jinglut jingsep jong u.
