Shillong, Iaiong 10: Ka Estimates Committee ka Iingdorbar Thaw Ain ka Jylla, ka la bthah ïa ka tnat Social Welfare ban pan jingïarap pisa naka Sorkar Pdeng bad Sorkar Jylla na ka bynta ban tei ïa ki Anganwadi Centre ha palat 1600 tylli ki shnong ha Meghalaya ki bym don ia kumne kine ki jingshakri paidbah.
Hadien ba wai ka jingïalang bishar kam, u Chairman ka Estimate Committee Bah Mayralborn Syiem u la ong, “Ngi sngewkhia ïa ki shnong ki bym pat don ïa ki Anganwadi Centre. Ki don palat 1600 tylli ki shnong ki bym don ïa ki Anganwadi Centre. Ngi la shimkhia ïa kane bad ngi la ai jingmut ïa ki tnat Social Welfare ban wad ki lad lynti naka Sorkar Pdeng bad ka Sorkar Jylla”.
Ka Committee ka la pynksan ruh ban wad ki lad lynti ban weng ia ki jingeh haba iadei bad ka jingshongkha khleh bad ka jingarmet dang khynnah.
U Bah Mayralborn u la pynpaw ia ka jingdonkam ban pynsngewthuh ia ki nongshong shnong, khamtam ia ki samla, lyngba ka jingthmu kum ka Mission 1000.
“Ngi donkam ban pynsngewthuh ia ki samla shynrang bad kynthei jong ngi ban lait na ki jait jingeh khamtam eh haba iadei bad ka shongkha khynnah bad ka jingarmet dang khynnah. Ngi donkam ban kynthup lang iaki nongialam niam, ki nongialam shnong, ki seng kynthei, ki seng treimon sngewbha, bad ki sengbhalang ban pynsngewthuh ia ka bynta jong ka tnat Social Welfare.”
U Bah Mayralborn u la ban jur ia ka jingdonkam ban iatreilang ban ialeh pyrshah ia ki jingeh ha ka imlang sahlang, da kaba ong, “Kum u nongthaw ain, nga sngew ba ka dei ka kamram jong nga ban pynthikna ha kano kano ka jingialang paidbah ban pynsngewthuh ia ki briew ba ngi hap ban ong em ia u drok, em ia ka jingshongkha khynnah, em ia ka jingarmet dang khynnah, em ia u duma, bad ia kiwei kiwei ki jingeh baroh kiba don ha ka imlang sahlang. Ngi donkam ban iatreilang ban pynthikna ba kan ai jingmyntoi ia baroh.”
Haba iadei bad ka jingkhynra ki Pulit iaki kam awria ha Khyndai Lad, u Bah Mayralborn ula ong “Ha ka jingïalang, ngi la ïakren shaphang ki daw kiba lam sha kane ka kam beain kaba ktah mat iong ia ka imlang sahlang, Ngi donkam ban iatreilang bad baroh ki tnat ban pynthikna ïa ka jingshngaiñ bad ka jingïada jong baroh naka imlang sahlang.”
Ka Committee ka la shong bishar kam iaki 5 tylli ki tnat treikam Sorkar ba kynthup ka tnat pule puthi, PWD, PHE, Information Technology, bad ka tnat Pulit.
“Ka jingpeit bniah jong ka Committee kam dei ban kdew kti iano iano, ym ban kynnoh iano iano hynrei ban pynthikna ba kino kino ki skhim kiba la wanrah hapoh ka Iingdorbar bad kiba la mynjur lyngba ka mang tyngka kidei ban poi shaki paidbah ha baroh kawei ka Jylla” ula ong.
