Shillong, Nohprah 08 : Ka bor district ka East Garo Hills kala pynmih ia ka jingpynbna ba bthah ia ki nongshongshnong, ki jaka treikam, ki dukan bad kiwei kiwei ba kin shim ia ki lad jingiada khnang ba kin lait na ki jingshah dait ha ki ksew surok ha ki jaka paidbah ne jaka shimet, kaba long kat kum ka hukum ka Iingkashari Supreme Court.
Ia kane ka jingpynbna la pynmih da u Deputy Commissioner, uba la kyrpad ia ka jingiatreilang na baroh ki nongshong shnong,ki jaka treikam,ki dukan bad ki dorbar shnong ba kin pynthikna ia ka jingshngain na ki jingshah dait ksew.
“Ka bor district ka kyntu ia baroh ki kynhun ba don bynta ba kin shim mardor ia ki sienjam ban khanglad ia ka jingjia dait ksew surok bad pynthikna ia ka jingshngain u paidbah” ong ka jingpynbna.
Kane ka jingbthah ka kynthup ia kiba bun ki lad jingiada kum ka jingkiar ban aibam iaki ksew surok hapoh ne hajan ki hospital, ki skul, ki iew, ki jaka ieng bos nalen ki lynti iaid ha shnong, ker bha ia ki iing ban nym ioh rung ki ksew surok, pyntip haba iohi ia ki ksew lamwir, ki jingshah dait ksew lane iohi ia ki ksew surok hapoh ki skul, hospital, bad ki iew bad ym dei ban shu bret ia ki bam bala ieh sharud shakiar.
