Shillong Jylliew 07: Ka Ophis District School Education Officer (DSEO), South West Khasi Hills kala bthah ia baroh ki skul jong ka District ba kin pynsangeh shuwa shipor ia ka jingpynieng lain mynstep ia ki khynnah skul ne Assembly namar ka jingshit kyrang palat ka sngi.
Ka Ophis kala phah ia kane ka jingbthah sha baroh ki Principal/Headmaster/Headmistress jong ki skul hapoh ka District kiba kynthup naduh ki skul Higher Secondary, Secondary, Upper Primary bad Lower Primary.
Kat kum ka jingbthah la ong ba ki skul kin pynsangeh shuwa ha kine ki khyndiat sngi ia ka jingpynieng lain ia ki khynnah khamtam ki skul ha ki jaka khappud bad ka Bangladesh haba buh hakhmat ia ka koit ka khiah ki khynnah tad haduh ba ka suin bneng kan long kumba ju long barabor.
Kane ka jingbthah kala mih hadien ba ka seng Khasi Students Union-South West Khasi Hills kala phah ia ka dorkhas sha ka Sub Divisional School Education Officer (SDSEO) ka South West Khasi Hills ba buh ia kane ka jingkyrpad.
Katkum ka dorkhas kaba la phah da u Chairman ka Education Cell u samla Evansroy Nongrem bad u Secretary ka Education Cell u samla Episcopal Lyngdoh kila kyrpad ban pynsangeh shwa shipor ha kaban pynieng lain iaki khynnah skul shwa ban long skul ne Morning Assembly namar ka jingshit palat jong ka sngi bad bun ki kmie ki kpa kila pyntip sha ka seng ba don ki khynnah kiba kyllong bad iohpang.
Ka seng KSU kala kyrpad ba shimkhia lem ia kane khamtam eh ia ki skul kiba don ha ki thain khappud.
Ha kajuh ka por, ka DSEO kala bthah ruh ba ki bor skul kidei ban pynthikna ba ki khynnah skul kidei ban dih thikna ia ka um bad lada jia ba don kino kino ki khynnah skul ki iohpang dei ban rah mardor ia ki sha ki jaka sumar.
, South West Khasi Hills kala bthah ia baroh ki skul jong ka District ba kin pynsangeh shuwa shipor ia ka jingpynieng lain mynstep ia ki khynnah skul ne Assembly namar ka jingshit kyrang palat ka sngi.){kind=link}