Shillong, Jymmang 26 : U Director ka Higher & Technical Education Ambrose Ch Marak hynne ka sngi Thohdieng, ula bthah ia ka College of Teachers Education (PGT), Shillong, ban pynbun ia ki application form bad pynjlan ia ka sngi khatduh ban thep form na ka bynta ka jingpule B.Ed jong ka samoi 2023-2024.
Kane kala mih hadien baka kynhun ka Khasi Students’ Union (KSU) kala iakynduh ia u Ambrose, ba kyrpad ba un tuklar halor ka jingeh ba iakynduh da ki samla pule, kiba kwah ban leit pule ha PGT college.
Ki Samla pule ki hap ban ieng lain naduh shiteng miet tad haduh da plie ka Ophis ha ka por mynstep ban ioh ia ka application form hynrei watla katta kiba bun ki dang duh ia ki form.
“Namar kane ka jingeh, ka Union kam banse ban dawa ia ka College ban pynbun ia ki application form n aka 500 sha ka 1000 tylli bad ruh ban pynjlan ia ka sngi khatduh ha kaban thep ia ki form” ong u samla Pynkmenlang Sanmiet, Education Secretary ka KSU ha ka kyrwoh.
U Director ula kular ia ka kynhun ban bthah ia ki bor college ba kan pynbun ia ki application form bad ruh ban pynjlan ia ka sngi khatduh ban thep ia ki form” ula ong.
Ha ka shithi sha u Principal ka PGT College, u Ambrose ula ong “…..La pyntip sha ka Directorate ba ka college kala ai tang khyndiat eh ki application form sha ki samla ba kwah pule B.Ed jong ka samoi 2023-2024. Kane kan pynduh ia kiba bun ki samla kiba kwah ia ka form. Halor kane, la kyrpad ia phi ban pynbun ia ki form bad pynjlan ia ka sngi khatduh banthep ia ki form”.
Ha kajuh ka por, u samla Sanmiet ula pyntip ba ka KSU kala ai jingmut ruh ba ka College kan pyntreikam noh da ka jingpynrung klas ia ki samla pule da kaba thep form online.
Haba iadei bad ka eksam CUET, ula ong ba ka KSU kala dawa ia ka Sorkar Jylla ban pynthikna ba ki samla pule na ka Jylla ki dei ban ioh thoh ia ki eksam ha ki centre ba don hapoh ka Jylla. Kat kum ka jingong jong u, kane ka long namar ki don ki samla pule kiba hap leit ialeh ia ka eksam CUET sha kiwei pat ki Jylla
