Shillong, Jymmang 26: U Myntri Rangbah ka Jylla Conrad K Sangma hynne ka sngi Thohdieng ula wanrah ia ka jingbuh thong ka Jylla (State Vission) ban kynjoh ia ka ioh ka kot ba $10 billion sha ka World Bank Panel ha Meghalaya House, New Delhi.
Ki Nongwan iashimbynta ba pawkhmat na ka World Bank ki dei u Director ha Ri India Augustus Tano Kouame, Lead Social Coordinator, Meghalaya Junko Onishi, Senior Economist Benedicte bad Senior Economist Mohan Gopalakrishnan.
Na ka liang ka Meghalaya pat ki dei u Myntri Rangbah ka Jylla bala synran da u Chief Secretary ka Jylla Bah Donald P Wahlang, u Development Commissioner Sampath Kumar bad Commissioner and Secretary Dr. Vijay Kumar D.
Haba kren ha ka jingialang, u Myntri Rangbah ka Jylla ula ong “Ngi don ha ka jingiakren ba seisoh bha bad u Auguste Tanu Kouame, u Director ka Workd Bank ha India bad ka kynhun jong u, halor ka lynti ba shakhmat ban kham pynjanai ia ka synshar khaddar bad ki project ba ai ia ki jingshakri ba hun ha Meghalaya. Kum ka Sorkar, ngi la kut jingmut ban pynthikna ba ka jingshakri ka Sorkar bad ka jingpyntreikam ia ki project kan long kaba janai bha”.
Ula bynrap “Ngi la takhuh ia shibun ki jingtynjuh ha ka jingpyntreikam ia ki project, hynrei, lyngba ka jingtrei shitom ba khlem shongthait, ngi la lah ban ioh kheit ia u soh ka jingjop da ka jingiarap jong ki project ba bei pisa na shabar. Ka World Bank ka dei ka paralok ba la synniang bha sha ka roi ka par ka Meghalaya bad kaba iai btengban ai ka jingkyrshan”.
Ka World Bank mynta kala bei tyngka ia ki project ba kot palat ia ka T. 2400 klur hapoh ka Jylla, bad ia ka jingiaid ki kam ki jam jong kine ki project la ai jingkhein sha ka kynhun ka World Bank da ki Ophisar ka Jylla.
Ki Nongmihkhmat ka World Bank kila pynpaw ia ka jingkmen ban iohi ia ka jingjop jong ki project bad kila iaroh ia ka Meghalaya halor ka jinglah ban pyntreikam bha. Ka World Bank kala kular ruh ban iai bteng ha kaban kyrshan bad ban nang ai ia ki project ha ki snem ban wan. Kine ki project ki long kiba kongsan ban pynurlong ia ka jingphohsniew ka Meghalaya ban kynjoh ia ka thong ban long ka Jylla kaba ka ioh ka kot ka kynjoh ia ka $10 billion.
