Shillong, Lber 23: Ki longiing kiba pyndonkam ia ki LPG ha East Khasi Hills kin hap ban pyndep ia ka jingpynshisha lyngba ki kor Digital bad eKYC bad ki nongsam LPG ki jongki ne kin mad ia ka jingthud ha kaban ioh ia ki cylinder gas ne tyndong lyer, la maham ki bor pyniaid district ha ka jingpynbna paitbah kaba la pynmih hynne ka sngi nyngkong.
Ka notis na ka Deputy Commissioner (Supply) kala ong, ba ka jingbud ryntih ia ka Digital Authentication Compliance (DAC) bad eKYC ka long kaba kongsan bha “ban pynthikna ba kan ym don kano kano kano ka jingthud ha ka jingsam ia ki LPG Cylinders.”
Kala pynbeit ruh ba kan don ka ‘Interval’ ne jingkylluid ka por kaba 25 sngi hapdeng jong ka ‘Refill’ jingpyndap ia ki cylinder bad kano kano ka ‘Booking’ ne ka jingpan biang kaba la leh hashwa jong ka 25 sngi na ka Tarik kaba khatduh jong ka jingwan ai, yn ym pdiang shuh.
“Baroh ki nongpyndonkam ia ki LPG la bthah ba kidei ban iatreilang bad ki nongsam Gas ki jongki ban pyndep mardor ia kitei ki jingbthah” la pynpaw ha ka jingbthah bad la kyntu ia ki nongpyndonkam ba kidei ban wad ia ki jingtip bad jingiarap na ki nongsam gas.
